రోహిత్ ఊహించినట్లే.. ధావన్ ఔట్

‘భారత్ బ్యాట్స్‌మెన్‌కి న్యూజిలాండ్ ఎడమ చేతి వాటం ఫాస్ట్ బౌలర్ ట్రెంట్ బౌల్ట్‌ నుంచి ఈ వన్డే సిరీస్‌లో గట్టి సవాల్ ఎదురుకానుంది’ రెండు రోజుల క్రితం భారత ఓపెనర్ రోహిత్ శర్మ వ్యాఖ్య. అతని ఊహే నిజమైంది. వాంఖడే వేదికగా ఆదివారం జరుగుతున్న తొలి వన్డే.. ఆరంభంలోనే వరుస ఓవర్లలో శిఖర్ ధావన్ (9: 12 బంతుల్లో 1x4), రోహిత్ శర్మ (20: 18 బంతుల్లో 2x6)లను పెవిలియన్‌కి పంపించేశాడు ట్రెంట్ బౌల్ట్.

ఇన్నింగ్స్ నాలుగో ఓవర్ వేసిన బౌల్ట్ బౌలింగ్‌లో శిఖర్ ధావన్ బంతిని ప్లిక్ చేసేందుకు ప్రయత్నిస్తూ కీపర్ టామ్ లాథమ్ చేతికి చిక్కాడు. బంతి అతని బ్యాట్ అంచున తాకుతూ కీపర్ చేతుల్లోకి వెళ్లింది. తర్వాత ఓవర్‌ వేసిన టిమ్ సౌథీ బౌలింగ్‌లో వరుసగా రెండు సిక్సర్లు బాది మంచి ఊపు మీద కనిపించాడు రోహిత్ శర్మ. కానీ.. ఆరో ఓవర్‌లో మళ్లీ బౌలింగ్‌కి వచ్చిన ట్రెంట్ బౌల్ట్ రోహిత్‌ని క్లీన్‌ బౌల్డ్ చేశాడు. బంతి గమనాన్ని అంచనా వేయడంలో రోహిత్ తడబడ్డాడు. దీంతో బంతి నేరుగా వెళ్లి ఆఫ్‌ స్టంప్‌ని గీరాటేసింది. 5.4 ఓవర్లు ముగిసే సమయానికి భారత్ 29/2తో నిలిచింది.