కాన్పూర్‌లో టీమిండియాని ఓడిస్తాం: కివీస్

పుణె వన్డేలో చేసిన తప్పిదాలను సరిదిద్దుకుని.. కాన్పూర్ వన్డేలో భారత్‌ని ఓడించి సిరీస్‌ చేజిక్కించుకుంటామని న్యూజిలాండ్ కెప్టెన్ కేన్ విలియమ్సన్ ధీమా వ్యక్తం చేశాడు. గత ఆదివారం వాంఖడేలో జరిగిన తొలి వన్డేలో గెలిచిన న్యూజిలాండ్.. బుధవారం ముగిసిన రెండో వన్డేలో 6 వికెట్ల తేడాతో భారత్ చేతిలో ఓడిపోయిన విషయం తెలిసిందే. దీంతో మూడు వన్డేల ఈ సిరీస్‌ ప్రస్తుతం 1-1తో సమమైంది. విజేత నిర్ణయాత్మక మూడో వన్డే కాన్పూర్ వేదికగా ఆదివారం జరగనుంది.

‘మా టాప్ ఆర్డర్ బ్యాట్స్‌మెన్ పుణె వన్డేలో విఫలమయ్యారు. మ్యాచ్ ఆరంభంలోనే పేసర్లు భువనేశ్వర్, జస్‌ప్రీత్ బుమ్రా చక్కగా లెంగ్త్‌కి కట్టుబడి బౌలింగ్ చేశారు. దీంతో మా టాప్ ఆర్డర్ తడబడింది. ఈ తప్పిదాల నుంచి పాఠాలు నేర్చుకుంటాం. భారత్‌ లాంటి కఠినమైన ప్రత్యర్థిని ఓడించాలంటే మెరుగైన ప్రదర్శన చేయాలని మాకు తెలుసు. కానీ.. పుణె పిచ్‌ నుంచి మాకు సహకారం లభించలేదు. వాంఖడే విజయం తర్వాత.. పుణె వన్డేలో మాపై భారీగా అంచనాలు పెరిగిపోయాయి. కానీ.. మేము వాటిని అందుకోలేకపోయాం. అయితే కాన్పూర్ వన్డేలో మాత్రం పుంజుకుని విజయం సాధిస్తాం’ అని కేన్ విలియమ్సన్ ధీమా వ్యక్తం చేశాడు.