కోహ్లిసేన ముంగిట సరికొత్త రికార్డ్..!

న్యూజిలాండ్‌తో టీ20 సిరీస్‌కి ముందు భారత్ ముంగిట ఓ సరికొత్త సవాల్ నిలిచింది. ఇప్పటికే ముగిసిన మూడు వన్డేల సిరీస్‌ని 2-1తో చేజిక్కించుకున్న టీమిండియా.. ఒకసారి కూడా న్యూజిలాండ్‌ని టీ20ల్లో ఓడించలేకపోయింది. దీంతో ఈ చెత్త రికార్డుని బుధవారం ఢిల్లీలోని ఫిరోజ్ షా కోట్ల స్టేడియంలో జరగనున్న తొలి టీ20తో తుడిచిపెట్టేయాలని కోహ్లిసేన ఉవ్విళ్లూరుతోంది. మరోవైపు.. వన్డే సిరీస్‌ని కొద్దిలో చేజార్చుకున్న కివీస్ కూడా కనీసం టీ20 సిరీస్‌తోనైనా స్వదేశానికి గౌరవంగా తిరిగి వెళ్లాలని ఆశిస్తోంది.

భారత్, న్యూజిలాండ్ జట్లు ఇప్పటి వరకు ఐదు సార్లు టీ20ల్లో తలపడగా.. ఐదింట్లోనూ కివీస్‌దే పైచేయిగా నిలిచింది. చివరి సారి.. నాగ్‌పూర్ వేదికగా గత ఏడాది జరిగిన టీ20 ప్రపంచకప్‌లో న్యూజిలాండ్‌తో తలపడిన భారత్ జట్టు ఘోరంగా విఫలమైంది. తొలుత బ్యాటింగ్ చేసిన కివీస్‌ 126 పరుగులకే పరిమితమవగా.. అలవోకగా లక్ష్యాన్ని ఛేదిస్తుందనుకున్న టీమిండియా అనూహ్యంగా 79 పరుగులకే కుప్పకూలిపోయింది. ఈ మ్యాచ్‌లో స్పిన్నర్ మిచెల్ శాంట్నర్ 11 పరుగులిచ్చి నాలుగు కీలక వికెట్లు పడగొట్టాడు.