భారత్‌పై షోయబ్ మాలిక్ హాఫ్ సెంచరీ..!

ఆసియా కప్‌లో భారత్, పాకిస్థాన్ మధ్య మ్యాచ్ ఆసక్తికరంగా సాగుతోంది. టాస్ గెలిచిన పాకిస్థాన్ జట్టు బ్యాటింగ్ ఎంచుకోగా.. ఆరంభంలోనే ఆ జట్టుని 58/3తో భారత్‌ ఒత్తిడిలోకి నెట్టింది. కానీ.. మిడిలార్డర్ బ్యాట్స్‌మెన్ షోయబ్ మాలిక్ (52 నాటౌట్: 67 బంతుల్లో 3x4,1x6) పట్టుదలతో అర్ధశతకం బాది పాక్‌‌ని మళ్లీ మ్యాచ్‌లోకి తెచ్చాడు. కెప్టెన్ సర్ఫరాజ్ అహ్మద్ (38 నాటౌట్: 60 బంతుల్లో 2x4)తో కలిసి మాలిక్ నాలుగో వికెట్‌కి అభేద్యంగా 88 పరుగుల భాగస్వామ్యం నెలకొల్పడంతో 36 ఓవర్లు ముగిసే సమయానికి పాక్ 146/3తో నిలిచింది.

అంతకముందు పాక్ ఓపెనర్ ఇమామ్ ఉల్ హక్ (10), బాబర్ అజామ్ (9) నిరాశపరిచినా.. ఫకార్ జమాన్ (31: 44 బంతుల్లో 1x4, 1x6) కీలక ఇన్నింగ్స్ ఆడాడు. అయితే.. జమాన్ ఔటవడంతో జట్టు స్కోరు బోర్డుని నడిపించే బాధ్యత తీసుకున్న మాలిక్.. సహనంతో భారత బౌలర్లని ఎదుర్కొన్నాడు. మధ్యలో ఒత్తిడిని తగ్గించుకునేందుకు చాహల్ బౌలింగ్‌లో భారీ సిక్స్ బాదినా.. ఆ తర్వాత మళ్లీ ఎక్కువగా సింగిల్స్‌కే పరిమితమవుతూ కెరీర్‌లో 43వ అర్ధశతకాన్ని పూర్తి చేసుకున్నాడు. శుక్రవారం రాత్రి కూడా అఫ్గానిస్థాన్‌పై అజేయ అర్ధశతకంతో పాక్ జట్టుని చివరి ఓవర్‌లో షోయబ్ మాలిక్‌ గెలిపించిన విషయం తెలిసిందే.