IND vs SA 1st ODI ఆలస్యానికి కారణమిదే

భారత్, దక్షిణాఫ్రికా మధ్య ధర్మశాల వేదికగా ఈరోజు మధ్యాహ్నం ప్రారంభంకావాల్సిన తొలి వన్డే ఆలస్యంకానుంది. ధర్మశాల స్టేడియం పరిసరాల్లో భారీగా వర్షం పడటంతో.. పిచ్‌ని కవర్లతో కప్పి ఉంచడం ద్వారా మైదానం సిబ్బంది కాపాడగలిగారు. కానీ.. మైదానంలోకి కొన్ని ప్రదేశాల్లో నీరు నిల్వడంతో ప్రస్తుతం సిబ్బంది ఆరబెట్టే ప్రయత్నం చేస్తున్నారు. దీంతో.. ఒంటి గంటకి పడాల్సిన టాస్ కూడా ఆలస్యంకానుంది.

వాస్తవానికి గత ఏడాది సెప్టెంబరులోనూ భారత్, దక్షిణాఫ్రికా మధ్య జరగాల్సిన తొలి టీ20 మ్యాచ్ ఇలానే వర్షం కారణంగా రద్దయింది. అయితే.. ఈరోజు వర్షం పూర్తిగా తగ్గుముఖం పట్టినప్పటికీ.. మైదానం చిత్తడిగా మారడంతో దాన్ని మ్యాచ్‌కి అనువుగా సిద్ధం చేసేందుకు మైదానం సిబ్బంది శ్రమిస్తున్నారు. దీంతో.. 1.30 గంటలకి ప్రారంభకావాల్సిన మ్యాచ్‌ కనీసం అరగంట ఆలస్యమయ్యే సూచనలు కనిపిస్తున్నాయి.

దక్షిణాఫ్రికాతో ఇప్పటి వరకూ 84 వన్డేలాడిన భారత్ జట్టు 35 మ్యాచ్‌ల్లో గెలిచి.. ఏకంగా 46 మ్యాచ్‌ల్లో పరాజయాన్ని చవిచూసింది. ఓ మూడింట్లో మ్యాచ్‌ల్లో రిజల్ట్ రాలేదు. కానీ.. 2018 నుంచి మాత్రం సఫారీలపై టీమిండియా ఆధిపత్యం కొనసాగుతోందని రికార్డులు చెప్తున్నాయి. ఎంతలా అంటే..? చివరిగా దక్షిణాఫ్రికాతో ఆడిన ఏడు వన్డేల్లో కేవలం ఒకే ఒక్క మ్యాచ్‌లో మాత్రమే భారత్ జట్టు ఓడింది.