డికాక్​ లక్.. వికెట్ల ముందు ఆగిన బంతి

భారత్‌తో సెంచూరియన్ వేదికగా జరుగుతున్న రెండో వన్డేలో దక్షిణాఫ్రికా ఓపెనర్ డికాక్‌కి అదృష్టం కలిసొచ్చింది. గత గురువారం డర్బన్‌లో జరిగిన తొలి వన్డేలో ఔటవకపోయినా.. అంపైర్ తప్పు నిర్ణయంతో వికెట్ చేజార్చుకున్న డికాక్.. రెండో వన్డేలో ఔటయ్యే ప్రమాదం నుంచి తృటిలో తప్పించుకున్నాడు. అతని బ్యాట్‌ను తాకిన బంతి అనంతరం దొర్లుకుంటూ వెనక్కి వెళ్లి దాదాపు వికెట్లని తాకేలా కనిపించింది. కానీ.. డికాక్ అదృష్టం అడుగు దూరంలో బంతి నిలిచిపోయింది.

ఇన్నింగ్స్ రెండో ఓవర్ వేసిన జస్‌ప్రీత్ బుమ్రా తొలి బంతినే ఔట్‌సైడ్ ఆఫ్‌గా విసిరాడు. దాన్ని డిఫెన్స్ చేసేందుకు డికాక్ ప్రయత్నించగా.. ఎడ్జ్‌ తాకిన బంతి క్రీజులోనే అతని కాళ్లవద్ద పడి వికెట్ల వైపు దొర్లుతూ వెళ్లసాగింది. దీంతో కంగారుపడిన డికాక్.. దాన్ని కాలితో పక్కకి తోసేందుకు ప్రయత్నించి విఫలమయ్యాడు. అప్పటికే వికెట్ల సమీపానికి బంతి వెళ్లడంతో.. ఇక తాను ఔటనుకుని రెండో ప్రయత్నాన్ని కూడా విరమించుకున్నాడు. అయితే.. దొర్లుకుంటూ అలానే వెళ్లిన బంతి వికెట్లకి అరడుగు దూరంలో నిలిచిపోయింది. దీంతో డికాక్ ఊపిరిపీల్చుకోగా.. అప్పటికే ఔటనుకుని ఆనందపడిన భారత ఫీల్డర్లు నిరాశతో నిట్టూర్చారు. మ్యాచ్‌లో డికాక్ ఎదుర్కొన్న తొలి బంతే అది కావడంతో.. ఒకవేళ ఔటై ఉంటే.. గోల్డన్ డక్‌గా వెనుదిరగాల్సి వచ్చేది..!