మూడో టెస్టులో భారత్ 187కే ఆలౌట్

దక్షిణాఫ్రికా పర్యటనలో భారత్ బ్యాట్స్‌మెన్ ఆటతీరు మూడో టెస్టులోనూ మారలేదు. జొహనెస్‌బర్గ్ వేదికగా బుధవారం ఆరంభమైన ఈ టెస్టులో టాస్ గెలిచి తొలుత బ్యాటింగ్ చేసిన భారత్ జట్టు మొదటి ఇన్నింగ్స్‌లో 187 పరుగులకే పేలవ రీతిలో కుప్పకూలిపోయింది. కెప్టెన్ విరాట్ కోహ్లి (54: 106 బంతుల్లో 9x4), చతేశ్వర్ పుజారా (50: 179 బంతుల్లో 8x4) అర్ధ శతకాలతో ఫర్వాలేదనిపించగా.. చివర్లో టెయిలెండర్ భువనేశ్వర్ కుమార్ (30: 49 బంతుల్లో 4x4) హిట్టింగ్‌తో మెప్పించాడు. సఫారీ బౌలర్లలో కగిసొ రబాడ మూడు వికెట్లు తీయగా.. మోర్నీ మోర్కెల్, ఫిలాండర్, ఆండిల్ తలో రెండు వికెట్లు, ఎంగిడి ఒక వికెట్ తీశాడు.

టాస్ గెలిచిన విరాట్ కోహ్లి మరో ఆలోచన లేకుండా బ్యాటింగ్ ఎంచుకున్నాడు. సిరీస్‌లో పేలవ ఆటతీరుని ప్రదర్శిస్తున్న ఓపెనర్లు కేఎల్ రాహుల్ (0), మురళీ విజయ్ (8) మరోసారి విఫలమవగా.. కెప్టెన్ కోహ్లి, చతేశ్వర్ పుజారా భారత్ ఇన్నింగ్స్‌ని తొలి సెషన్‌లో నడిపించారు. వీరిద్దరూ మూడో వికెట్‌కి 84 పరుగుల భాగస్వామ్యం నెలకొల్పడంతో భారత్‌ మెరుగైన స్కోరు చేసేలా కనిపించింది. కానీ.. జట్టు స్కోరు 97 వద్ద విరాట్ కోహ్లిని ఔట్ చేసి భారత్‌కి ఎంగిడి షాకివ్వగా.. రోహిత్ శర్మ స్థానంలో విమర్శకుల మద్దతుతో జట్టులోకి వచ్చిన అజింక్య రహానె (9: 27 బంతుల్లో 1x4) పేలవ రీతిలో ఔటై నిరాశపరిచాడు. అయితే.. ఒక ఎండ్‌లో క్రీజులో పాతుకుపోయిన పుజారా.. వికెట్ల వేటకి అడ్డుకట్ట వేసేందుకు శతవిధాలా ప్రయత్నించాడు.

టెస్టుల్లో రికార్డు స్థాయిలో 54వ బంతికి తన పరుగు ఖాతా తెరిచిన పుజారా.. సఫారీ బౌలర్ల సహనాన్ని పరీక్షించాడు. ఈ క్రమంలోనే అర్ధశతకం పూర్తి చేసుకున్న ఈ మిడిలార్డర్ బ్యాట్స్‌మెన్.. జట్టు స్కోరు 144 వద్ద ఔటవగా.. భారత్ బ్యాటింగ్ ఆర్డర్ గాడితప్పింది. వరుస ఓవర్లలో పుజారాతో పాటు పార్థీవ్ పటేల్ (2), హార్దిక్ పాండ్య (0) వెనుదిరగగా.. మహ్మద్ షమీ (8), ఇషాంత్ శర్మ (0) ఇటొచ్చి అటు వెళ్లిపోయారు. చివర్లో జస్‌ప్రీత్ బుమ్రా (0 నాటౌట్: 7 బంతుల్లో) సాయంతో భువనేశ్వర్ హిట్టింగ్ చేయడంతో భారత్ కనీసం 187 పరుగులైనా చేయగలిగింది.