IND vs SA: కేప్‌టౌన్‌లో ఈరోజు ఫస్ట్ ఓవర్‌లోనే భారత్‌కి వికెట్.. బుమ్రా మ్యాజిక్

భారత్, దక్షిణాఫ్రికా మధ్య కేప్‌టౌన్ వేదికగా జరుగుతున్న మూడో టెస్టులో రెండో రోజైన బుధవారం ఆట ప్రారంభమైంది. ఓవర్‌నైట్ స్కోరు 17/1తో ఈరోజు తొలి ఇన్నింగ్స్‌ని కొనసాగించిన దక్షిణాఫ్రికా జట్టు.. అదే స్కోరు వద్ద రెండో వికెట్ చేజార్చుకుంది. ఈరోజు తొలి సెషన్‌లో ఫస్ట్ ఓవర్ వేసిన జస్‌ప్రీత్ బుమ్రా రెండో బంతికే ఓపెనర్ మర్‌క్రమ్ (8: 22 బంతుల్లో 1x4)‌ని క్లీన్ బౌల్డ్ చేశాడు. ఫస్ట్ ఓవర్‌లో మొదటి బంతిని గుడ్ లెంగ్త్ రూపంలో బుమ్రా విసరగా.. మర్‌క్రమ్ ఆడకుండా వదిలేశాడు. అలానే రెండో బంతిని కూడా విసిరిన బుమ్రా.. ఈసారి లోపలికి టర్న్ చేశాడు. అయితే.. మర్‌‌క్రమ్ మాత్రం మొదటి బంతి తరహాలో ఆఫ్ స్టంప్‌కి వెలుపలగా బంతి వెళ్తుందని భ్రమించి.. విడిచి పెట్టేందుకు బ్యాట్‌ని పైకి ఎత్తేశాడు. కానీ.. అతను ఊహించని విధంగా లోపలికి వచ్చిన బంతి నేరుగా వెళ్లి ఆఫ్ స్టంప్‌ని గీరాటేసింది. దాంతో.. నోరెళ్లబెట్టడం మర్‌‌క్రమ్ వంతైంది.

మంగళవారం ప్రారంభమైన ఈ మ్యాచ్‌లో ఫస్ట్ బ్యాటింగ్ చేసిన భారత్ జట్టు 223 పరుగులకి తొలి ఇన్నింగ్స్‌లో ఆలౌటైంది. కెప్టెన్ విరాట్ కోహ్లీ (79: 201 బంతుల్లో 12x4, 1x6) చాలా రోజుల తర్వాత చెప్పుకోదగ్గ ఇన్నింగ్స్ ఆడగా.. చతేశ్వర్ పుజారా (43: 77 బంతుల్లో 7x4) తన సహజశైలికి భిన్నంగా ఆడాడు. దక్షిణాఫ్రికా బౌలర్లలో కగిసో రబాడ నాలుగు వికెట్లు పడగొట్టగా.. జాన్‌సెన్ మూడు, ఒలివర్, లుంగి ఎంగిడి, మహరాజ్ ఒక్కో వికెట్ తీశారు.