కోహ్లి కోసం రెండు వ్యూహాలు సిద్ధం..!

భారత కెప్టెన్ విరాట్ కోహ్లి కోసం తాము ప్రత్యేకంగా రెండు వ్యూహాలు సిద్ధం చేసినట్లు దక్షిణాఫ్రికా ఫాస్ట్ బౌలర్ కాగిసో రబాడ వెల్లడించాడు. ఆరు వన్డేల సిరీస్‌లో ఇప్పటికే రెండు వన్డేలు ముగియగా.. మూడో వన్డే బుధవారం సాయంత్రం 4.30 నుంచి జరగనుంది. సొంతగడ్డపై వరుసగా రెండు వన్డేలు ఓడిన నేపథ్యంలో సఫారీలు ఈ సారి కొత్త వ్యూహంతో బరిలోకి దిగనున్నట్లు తెలుస్తోంది. మణికట్టు స్పిన్నర్లు చాహల్, కుల్దీప్ యాదవ్‌ల జోరుకి అడ్డుకట్ట వేసేందుకు నెట్స్‌లో దాదాపు ఐదు మంది మణికట్టు స్పిన్నర్ల బౌలింగ్‌లో దక్షిణాఫ్రికా బ్యాట్స్‌మెన్ ప్రాక్టీస్ చేసినట్లు సమాచారం.

తొలి రెండు వన్డేలోనూ ఛేదనలో ముందుండి జట్టుని నడిపించిన కెప్టెన్ విరాట్‌కోహ్లి‌ని మూడో వన్డేలో తొందరగా ఔట్ చేయగలిగితే.. టీమిండియా‌పై ఒత్తిడి తేవొచ్చని మీడియా సమావేశంలో రబాడ అభిప్రాయపడ్డాడు. ‘భారత జట్టులోని టాప్ ఆర్డర్ బ్యాట్స్‌మెన్‌ అందరి కోసం వ్యూహాల్ని సిద్ధం చేశాం. ముఖ్యంగా కెప్టెన్ విరాట్ కోహ్లి కోసం రెండు ప్రత్యేక వ్యూహాలు ఉన్నాయి. అందులో ఒకటి.. షార్ట్ బాల్. ఫీల్డింగ్‌లో మెరుగ్గా రాణించగలిగితే.. మూడో వన్డేలో కచ్చితంగా భారత్‌కి పోటీనిస్తాం. ఆరు వన్డేల సిరీస్‌లో 0-2తో వెనకబడినంత మాత్రానా.. సిరీస్ చేజారినట్లు కాదు. ఇంకా పోటీలో ఉన్నాం’ అని రబాడ ధీమా వ్యక్తం చేశాడు.