భారత్‌పై క్లీన్‌స్వీప్ మా టార్గెట్: ఫిలాండర్

భారత్‌ని టెస్టుల్లో క్లీన్‌స్వీప్ చేయడమే ప్రస్తుతం తమ జట్టు లక్ష్యమని దక్షిణాఫ్రికా ఫాస్ట్ బౌలర్ ఫిలాండర్ వెల్లడించాడు. మూడు టెస్టుల ఈ సిరీస్‌లో ఇప్పటికే రెండు టెస్టులు ముగియగా.. దక్షిణాఫ్రికా 2-0తో ఆధిక్యంలో కొనసాగుతోంది. బుధవారం నుంచి చివరి టెస్టు ప్రారంభంకానున్న నేపథ్యంలో మీడియాతో ఫిలాండర్ మాట్లాడాడు. తొలి రెండు టెస్టుల్లోనూ భారత బౌలర్లు మెరిసినా.. టాప్ ఆర్డర్ బ్యాట్స్‌మెన్ ఘోరంగా విఫలమయ్యారు. దీంతో కనీసం మూడో టెస్టులోనైనా సత్తాచాటి పరువు నిలుపుకోవాలని టీమిండియా ఆశిస్తోంది.

‘చివరి టెస్టు గురించి దక్షిణాఫ్రికా ఏమీ అతిగా ఆలోచించడం లేదు. జట్టుకి ఇది మరో మ్యాచ్ మాత్రమే. కానీ.. ప్రతి మ్యాచ్ గెలవాలనే తపనతోనే ఆడతాం. ఇప్పటికే సిరీస్ చేజిక్కినా.. ఉదాసీనతకి తావివ్వకుండా మూడో టెస్టులోనూ గెలిచి సిరీస్‌లో భారత్‌ని వైట్‌వాష్ చేస్తాం. ఇందుకోసం ఇప్పటికే కఠినంగా ప్రాక్టీస్ చేసి బుధవారం మ్యాచ్‌కి సిద్ధమయ్యాం. టెస్టు ర్యాంకింగ్స్‌లో జట్టు మళ్లీ అగ్రస్థానాన్ని దక్కించుకోవాలంటే.. ఇకపై ఆడే అన్ని టెస్టుల్లోనూ గెలవాలని నిర్ణయించుకున్నాం’ అని ఫిలాండర్ ధీమా వ్యక్తం చేశాడు.