10వేల పరుగులకి చేరువలో ధోనీ

భారత మాజీ కెప్టెన్ మహేంద్ర సింగ్ ధోనీ కెరీర్‌లో అరుదైన రికార్డుకి చేరువయ్యాడు. శ్రీలంకతో ధర్మశాల వేదికగా గత ఆదివారం ముగిసిన తొలి వన్డేలో అసాధారణ అర్ధ శతకంతో మెప్పించిన ధోనీ.. మరో 109 పరుగులు చేస్తే వన్డేల్లో 10వేల పరుగులు పూర్తి చేసిన నాలుగో భారత బ్యాట్స్‌మెన్‌గా రికార్డుల్లోకెక్కనున్నాడు. మొహాలి వేదికగా శ్రీలంకతో బుధవారం రెండో వన్డే జరగనుంది.

భారత్ తరఫున వన్డేల్లో ఇప్పటి వరకు 10వేల పరుగులు పూర్తి చేసిన క్రికెటర్లు ముగ్గురే. ఇందులో దిగ్గజ క్రికెటర్ సచిన్ తెందుల్కర్ 259 ఇన్నింగ్స్‌ల్లో ఈ రికార్డుని అందుకోగా.. తర్వాత గంగూలీ (263), రాహుల్ ద్రవిడ్ 287 ఇన్నింగ్స్‌ల్లో 10వేల పరుగుల మైలురాయిని అందుకున్నాడు. ప్రస్తుతం 310 వన్డేలాడి 267 ఇన్నింగ్స్‌ల్లో కలిపి ధోనీ 9,891 పరుగులతో కొనసాగుతున్నాడు. పెళ్లి కారణంగా శ్రీలంకతో వన్డే సిరీస్‌ నుంచి తప్పుకున్న విరాట్ కోహ్లి కేవలం 194 ఇన్నింగ్స్‌లోనే 9,844 పరుగులతో ఉండటం కొసమెరుపు.