IND vs PAK: భారత్ టార్గెట్ 134

టీ20 ప్రపంచకప్‌లో భాగంగా ఈరోజు జరుగుతున్న మ్యాచ్‌లో భారత్‌కి 134 పరుగుల లక్ష్యాన్ని పాకిస్థాన్ నిర్దేశించింది. మరూఫ్ (53: 49 బంతుల్లో 4x4), నిదాదార్ (52: 35 బంతుల్లో 5x4, 2x6) అర్ధశతకాలు సాధించడంతో టాస్ ఓడి తొలుత బ్యాటింగ్ చేసిన పాకిస్థాన్ జట్టు నిర్ణీత 20 ఓవర్లలో 7 వికెట్ల నష్టానికి 133 పరుగులు చేసింది. భారత బౌలర్లలో హేమలత, పూనమ్ యాదవ్ చెరో రెండు వికెట్లు పడగొట్టగా.. అరుంధతి రెడ్డి ఒక వికెట్ తీసింది.

మ్యాచ్‌లో టాస్ గెలిచిన భారత కెప్టెన్ హర్మన్‌ప్రీత్ కౌర్ తొలుత పాకిస్థాన్‌ని బ్యాటింగ్‌కు ఆహ్వానించింది. తొలి ఓవర్‌లోనే అరుంధరి రెడ్డి ఓపెనర్ అయేషా (0)ని డకౌట్ చేయగా.. అనంతరం వచ్చిన సోహాలి (3) లేని పరుగు కోసం ప్రయత్నించి రనౌటైంది. ఈ దశలో జవేరియా ఖాన్ (17) కాసేపు నిలకడగా ఆడినా.. జట్టు 30 వద్ద ఆమె కూడా రనౌటైంది. ఈ దశలో నిలకడగా ఆడిన మరూఫ్, నిదా జోడీ.. నాలుగో వికెట్‌కి 94 పరుగుల భాగస్వామ్యం నెలకొల్పింది. అయితే.. జట్టు స్కోరు 124 వద్ద మరూఫ్ ఔటవడంతో మళ్లీ తడబడిన పాక్.. ఆఖరికి 133/7కే పరిమితమైంది.