రవీంద్ర జడేజాకి తీవ్ర గాయం.. ఆస్ట్రేలియా టూర్ నుంచి ఔట్..?

ఆస్ట్రేలియా టూర్‌లో టీమిండియాని గాయాల బెడద వీడటం లేదు. టెస్టు సిరీస్ ఆరంభం నుంచి ఇప్పటికే మహ్మద్ షమీ, ఉమేశ్ యాదవ్, కేఎల్ రాహుల్ రూపంలో ముగ్గురు క్రికెటర్లు గాయంతో టూర్ నుంచి తప్పుకోగా.. శనివారం రోజున మరో ఇద్దరు క్రికెటర్లు గాయపడ్డారు. సిడ్నీ వేదికగా జరుగుతున్న మూడో టెస్టులో ఈరోజు బ్యాటింగ్ చేస్తుండగా.. తొలుత రిషబ్ పంత్ మోచేతికి గాయమవగా.. ఆ తర్వాత కొద్దిసేపటికే రవీంద్ర జడేజా ఎడమచేతి బొటనవేలికి గాయమైంది. దాంతో.. ఇద్దరినీ భారత్ ఇన్నింగ్స్ ముగిసిన తర్వాత స్కానింగ్ కోసం తీసుకెళ్లారు.

ఆస్ట్రేలియా ఫాస్ట్ బౌలర్ జోష్ హేజిల్‌వుడ్ విసిరిన బౌన్సర్ బంతిని ఫుల్ చేసేందుకు రిషబ్ పంత్ (36: 67 బంతుల్లో 4x4) ప్రయత్నించగా.. అతని బ్యాట్‌కి దొరకని బంతి వేగంగా వెళ్లి అతని మోచేతి భాగాన్ని తాకింది. దాంతో.. ఫిజియో సాయం తీసుకున్న పంత్.. ఆ తర్వాత అలానే బ్యాటింగ్‌ని కొనసాగించాడు. అనంతరం కొద్దిసేపటికే ఫాస్ట్ బౌలర్ మిచెల్ స్టార్క్ విసిరిన బౌన్సర్‌ని హిట్ చేసేందుకు రవీంద్ర జడేజా ప్రయత్నించాడు. కానీ.. అదనపు బౌన్స్ కారణంగా బంతి నేరుగా వెళ్లి జడేజా (28 నాటౌట్: 37 బంతుల్లో 5x4) ఎడమచేతి బొటన వేలి భాగాన్ని తాకింది. దాంతో.. మైదానంలోకి ఫిజియోని పిలిచిన జడేజా.. సపర్యల తర్వాత బ్యాటింగ్‌ని కొనసాగించాడు.

రిషబ్ పంత్ గాయం తీవ్రత ఎక్కువగా లేదని.. ఒకవేళ టీమ్‌కి అవసరమైతే మ్యాచ్‌లో ఐదో రోజైన సోమవారం అతను బ్యాటింగ్‌ కోసం వెళ్తాడని బీసీసీఐ అధికారి ఒకరు తెలిపారు. అయితే.. రవీంద్ర జడేజా గాయం తీవ్రత మాత్రం చాలా ఎక్కువగా ఉందట. అతని ఎడమచేతి బొటన వేలు స్థానభ్రంశమైనట్లు వార్తలు వస్తున్నాయి. అదే నిజమైతే..? సిరీస్ నుంచి రవీంద్ర జడేజా తప్పుకోవడం లాంఛనంకానుంది.