మొహాలీ వన్డేలో ధోనీ రికార్డులే రికార్డులు

మొహాలీ వన్డేలో భారత్ నిలకడగా ఆడుతోంది. కోహ్లి, ధోనీలు అర్ధ సెంచరీ సాధించడంతో భారత్ విజయం దిశగా సాగుతోంది. 286 పరుగుల భారీ లక్ష్యంతో బరిలోకి దిగిన టీమ్ ఇండియా 13 పరుగుల వద్ద రహానే వికెట్‌ను కోల్పోయింది. తర్వాత జట్టు స్కోరు 41 పరుగుల వద్ద రోహిత్ శర్మ సౌథీ బౌలింగ్‌లో ఎల్బీడబ్ల్యూగా వెనుదిరిగాడు. ఈ దశలో కెప్టెన్ ధోనీ, విరాట్ కోహ్లి జట్టును ఆదుకున్నారు. వీరిద్దరూ స్థిరంగా ఆడుతుండటంతో 28 ఓవర్లు ముగిసే సరికి భారత్ మరో వికెట్ కోల్పోకుండా 152/2గా నిలిచింది. అర్ధ సెంచరీ సాధించిన కోహ్లీ 62 పరుగులతో క్రీజులో ఉండగా, ధోనీ 66 పరుగులతో ఆడుతున్నాడు.

ఈ క్రమంలో ధోనీ వన్డేల్లో 9 వేల పరుగుల మైలు రాయిని చేరుకున్నాడు. 243 వన్డేలు ఆడిన ధోనీ 50కిపైగా సగటుతో ఈ ఘనత సాధించాడు. ఈ క్రమంలో 195 సిక్సర్లు బాదిన సచిన్ రికార్డును అధిగమించాడు. కెప్టెన్‌గా బాధ్యతలు చేపట్టాక 124 సిక్సర్లు బాదిన ధోనీ రికీ పాంటింగ్ (123 సిక్సర్లు)ను దాటేశాడు. అంతే కాకుండా కీపర్‌గా 150 స్టంపౌట్లు చేసి, ఈ ఘనత సాధించిన తొలి వికెట్ కీపర్‌గా రికార్డు నెలకొల్పాడు.

ఈ సిరీస్‌లో ఇరు జట్లు 1-1తో సమఉజ్జీలుగా ఉన్న నేపథ్యంలో ఈ మ్యాచ్ కీలకంగా మారింది. అంతకు ముందు బ్యాటింగ్ చేసిన కివీస్ జట్టు 198 పరుగులకే 8 వికెట్లు కోల్పోయి కష్టాల్లో పడగా.. నీషామ్, హెన్రీలు చివర్లో ధాటిగా ఆడారు. దీంతో ఆ జట్టు అనూహ్యంగా 285 పరుగుల భారీస్కోరు సాధించగలిగింది.