పాక్ జట్టులో‌కి ఇంజిమామ్‌ మేనల్లుడు

పాకిస్థాన్ జట్టులోకి ఆ దేశ మాజీ క్రికెటర్, ప్రస్తుత చీఫ్ సెలక్టర్ ఇంజిమామ్ ఉల్ హక్ మేనల్లుడు ఎంపికవడం తీవ్ర దుమారం రేపుతోంది. శ్రీలంక‌తో వన్డే సిరీస్‌ కోసం సెలక్టర్లు 15మందితో కూడిన జట్టుని శుక్రవారం ప్రకటించారు. జూన్‌లో ముగిసిన ఛాంపియన్స్ ట్రోఫీలో విజేతగా నిలిచిన పాక్ జట్టులో ఒక మార్పు మాత్రమే సెలక్టర్లు చేశారు. సీనియర్ బ్యాట్స్‌మెన్ అజహర్‌ అలీని తప్పించి.. అతని స్థానంలో ఇంజిమామ్ మేనల్లుడు ఇమామ్ ఉల్ హక్‌కి చోటిచ్చారు.

‘మోకాలి గాయం నుంచి అజహర్ అలీ పూర్తిగా కోలుకునేందుకే అతనికి శ్రీలంకతో సిరీస్‌ నుంచి విశ్రాంతినిచ్చాం’ అని సెలక్టర్లు జట్టు ఎంపిక అనంతరం మీడియాతో చెప్పారు. 21 ఏళ్ల ఇమామ్ ఉల్ హక్ 31 ఫస్ట్‌క్లాస్ మ్యాచ్‌లు మాత్రమే ఆడాడు. దేశవాళీ క్రికెట్‌లో అసమాన ప్రతిభ కనబర్చినందుకే అతడ్ని జట్టులో ఎంపిక చేశామని.. మరే కారణంతో కాదంటూ ఇంజిమామ్ ఉల్ హక్ స్పష్టం చేశాడు. అక్టోబరు 13 నుంచి దుబాయ్ వేదికగా ఐదు వన్డేల సిరీస్ ప్రారంభంకానుంది.