బెంగళూరుతో మ్యాచ్‌కు సన్‌రైజర్స్ టీం ఇదేనా?

ఎంతో కాలంగా ఎదురు చూస్తోన్న ఐపీఎల్ పండగ వచ్చేసింది. వేసవిలో క్రికెట్ అభిమానులకు అసలైన ఉత్సాహాన్ని తీసుకొచ్చింది. బుధవారం సన్ రైజర్స్ హైదరాబాద్, బెంగళూరు రాయల్ ఛాలెంజర్స్ జట్ల మధ్య ఆరంభ మ్యాచ్‌కు ఉప్పల్ స్టేడియం ఆతిథ్యం ఇవ్వనుంది. విరాట్ కోహ్లి, రాహుల్, డివిలియర్స్ లేకుండానే బెంగళూరు బరిలో దిగనుంది. తొలి మ్యాచ్‌కు సన్‌రైజర్స్ ఆటగాళ్లు ఎలా సన్నద్ధమయ్యారు. ఎవరెవరో జట్టులో ఉండే అవకాశం ఉందనే విషయమై విశ్లేషిస్తే...

సన్‌రైజర్స్ జట్టు బ్యాటింగ్, బౌలింగ్ విభాగాల్లో పటిష్టంగా ఉంది. వార్నర్, ధవన్, యువరాజ్ సింగ్ లాంటి హిట్టర్లు ఈ జట్టులో ఉన్నారు. భువనేశ్వర్, నెహ్రా తదితరులతో బౌలింగ్ విభాగం కూడా బలంగానే ఉంది. ఇటీవలే భారత్‌తో జరిగిన టెస్టు సిరీస్‌లో పరుగులు చేయడానికి ఇబ్బంది పడిన డేవిడ్ వార్నర్‌కు తొలి మ్యాచ్‌లో కఠిన పరీక్ష ఎదురు కానుంది. కాన్ఫిడెన్స్ తక్కువగా ఉన్నప్పటికీ.. వార్నర్, ధవన్ ఓపెనింగ్ చేసే అవకాశాలే ఎక్కువగా ఉన్నాయి.


దీపక్ హుడా మూడోస్థానంలో బ్యాటింగ్‌కు దిగే అవకాశాలు ఉన్నాయి. మిడిలార్డర్‌లో కీలకమైన యువరాజ్ సింగ్ నాలుగోస్థానంలో, కీపర్ నమన్ ఓజా తర్వాతి స్థానంలో బ్యాటింగ్‌కు రావచ్చు. లేదంటే ఓజాను టాప్ ఆర్డర్‌లో పంపినా ఆశ్చర్యపోవాల్సిన పనిలేదు.

ఆల్‌రౌండర్ల విషయానికి వస్తే.. ఆసీస్ ప్లేయర్ హెన్రిక్స్, తమిళనాడుకు చెందిన విజయ్ శంకర్ తుది జట్టులో చోటు దక్కించుకునే అవకాశాలే ఎక్కువగా ఉన్నాయి. బంగ్లా ప్లేయర్ ముస్తాఫిజుర్ అందుబాటులో లేకపోవడంతో.. అప్ఘాన్‌కు చెందిన మహ్మద్ నబీకి జట్టులో చోటు దక్కే వీలుంది.


అప్ఘాన్‌కు చెందిన రషీద్ ఖాన్, మహ్మద్ నబీ, ప్రవీణ్ తాంబే స్పిన్ బౌలింగ్ చేయగలరు కాబట్టి. వీరిలో నబీకే ఎక్కువ అవకాశాలున్నాయి. మరో స్పిన్నర్ కావాలంటే రషీద్‌‌కు ఎక్కువ అవకాశాలున్నాయి.

పేస్ బౌలింగ్ విభాగం నుంచి భువనేశ్వర్, నెహ్రాలకు చోటు దక్కడం ఖాయం. తొలి మ్యాచ్ తర్వాత బంగ్లా పేసర్ ముస్తాఫిజుర్ రెహ్మాన్ జట్టులోకి వస్తాడని కోచ్ టామ్ మూడీ బలంగా చెబుతున్నాడు. తొలి మ్యాచ్‌లో విజయం కోసం ఎస్ఆర్‌హెచ్ టీం తీవ్రంగా కసరత్తులు చేస్తోంది. హైదరాబాద్‌లో వర్షం పడినా సన్ ‌రైజర్స్ జట్టు ఇండోర్‌లో బ్యాటింగ్ ప్రాక్టీస్ చేస్తోంది.

Rain? No problem! We will have a hit indoors. @YUVSTRONG12 & @SDhawan25 at it. @SunRisers' captain @davidwarner31 on bowling duty #IPL pic.twitter.com/TF9T237o42 — IndianPremierLeague (@IPL) April 4, 2017