అందర్నీ అలరిస్తున్న ఐపీఎల్ థీమ్ సాంగ్!

కొద్ది రోజుల్లో ఆరంభం కానున్న ఇండియన్‌ ప్రీమియర్‌ లీగ్‌ కోసం రూపొందించిన థీమ్‌ సాంగ్‌ అందరినీ ఆకట్టుకుంటోంది. తొమ్మిది లీగ్‌లను విజయవంతంగా పూర్తి చేసుకొని పదో సీజన్‌లో అడుగుపెడుతున్న నేపథ్యంలో ‘దస్‌ సాల్‌ ఆప్కే నామ్‌’ టైటిల్‌తో ఈ పాట రూపొందించారు. బాలీవుడ్‌ సంగీత దర్శకులు సలీమ్‌-సులేమాన్‌ దీనికి సంగీతం సమకూర్చారు. బెన్నీ దాయల్‌ గళం అందించారు.

ఏప్రిల్ 5న హైదరాబాద్‌లోని రాజీవ్ గాంధీ అంతర్జాతీయ క్రీడా మైదానంలో ఐపీఎల్-2017 ప్రారంభమవుతుంది. ఈ థీమ్‌సాంగ్‌ ఆకట్టుకునేలా ఉండటంతో అభిమానుల నుంచి విశేష స్పందన వస్తోంది. సోనీమ్యాక్స్‌.. ఫేస్‌బుక్‌లో ఈ వీడియోను షేర్‌ చేసిన 48 గంటల్లోనే 25 లక్షల మందికి పైగా వీక్షించారు. సోషల్‌ మీడియాలో ప్రస్తుతం ఈ వీడియో ట్రెండింగ్‌లో ఉంది.