కోల్‌కతా నైట్‌రైడర్స్ కెప్టెన్‌‌గా హిట్టర్..?

ఐపీఎల్ 2018‌లో కోల్‌కతా నైట్‌రైడర్స్ జట్టు కెప్టెన్‌‌గా ఆస్ట్రేలియా విధ్వంసక హిట్టర్ క్రిస్‌లిన్‌ను నియమించాలని ఫ్రాంఛైజీ భావిస్తోంది. ఈ మేరకు చర్చలు జరుగుతుండగా.. ఒకవేళ అవకాశం వస్తే నాయకత్వ బాధ్యతల్ని చేపట్టేందుకు తాను సిద్ధమని సోమవారం మీడియాతో మాట్లాడుతూ క్రిస్‌లిన్ ప్రకటించాడు. గత ఏడాది ఐపీఎల్‌లో మెరుపు ఇన్నింగ్స్‌లతో ఆకర్షించిన క్రిస్‌లిన్‌ని ఇటీవల జరిగిన ఐపీఎల్ వేలంలో కోల్‌కతా నైట్‌రైడర్స్ రూ. 9.6కోట్లకి కొనుగోలు చేసింది. అయితే.. జట్టుకి సుదీర్ఘకాలం కెప్టెన్సీ వహించిన గంభీర్‌ని వేలంలో ఢిల్లీ డేర్‌డెవిల్స్ కొనుగోలు చేయడంతో.. తాజాగా ఫ్రాంఛైజీ కెప్టెన్‌ వేటలో పడింది. ఈ క్రమంలో ఉతప్ప పేరు ప్రముఖంగా వినిపించినా.. ఇప్పుడు క్రిస్‌లిన్‌వైపే ఫ్రాంఛైజీ మొగ్గు చూపుతున్నట్లు సమాచారం.

‘కోల్‌కతా నైట్‌రైడర్స్‌ జట్టు కెప్టెన్‌గా పనిచేసే అవకాశం లభిస్తే.. తప్పకుండా అంగీకరిస్తా. కోచింగ్ సిబ్బంది సైమన్ కటిచ్, కలిస్, హెరాత్ స్ట్రీక్‌తో నాకు మంచి అనుబంధం ఉంది. వారితో సౌకర్యవంతంగా పనిచేయగలను. అయితే.. గత పదేళ్లుగా ఐపీఎల్ ఆడుతున్న వారు ప్రస్తుతం జట్టులో ఉన్నారు. వారి అనుభవాన్ని ఇక్కడ విస్మరించలేం. ఒకవేళ వారికి కెప్టెన్సీ అవకాశం ఇచ్చినా.. నేను సహకరిస్తా. ఎందుకంటే.. నేను ఇంకా నేర్చుకునే దశలో ఉన్నా. అయితే.. కెప్టెన్‌గా ఫ్రాంఛైజీ నాకు అవకాశమిస్తే మాత్రం.. సత్తా నిరూపించుకుంటా’ అని క్రిస్‌లిన్ వెల్లడించాడు.