IPL 2019: రాజస్థాన్ కోచ్‌గా ప్యాడీ ఆప్టన్..!

ఐపీఎల్ 2019 సీజన్‌ కోసం ఇటీవల జరిగిన ఆటగాళ్ల వేలంలో రూ. 13.80 కోట్లు ఖర్చుచేసి 9 మంది క్రికెటర్లని కొనుగోలు చేసిన రాజస్థాన్ రాయల్స్ ఫ్రాంఛైజీ.. టీమ్ కోచింగ్ స్టాఫ్‌లోకి మళ్లీ ప్యాడీ ఆప్టన్‌ని తీసుకుంది.

2013 నుంచి 2015 ఐపీఎల్ సీజన్ వరకూ రాజస్థాన్ రాయల్స్ హెడ్‌ కోచ్‌గా పనిచేసిన ఆప్టన్.. తాను బాధ్యతలు తీసుకున్న తొలి ఏడాదే జట్టుని ప్లేఆఫ్ చేర్చాడు. అయితే.. ఆ తర్వాత ఫిక్సింగ్ కారణంగా రాజస్థాన్ రాయల్స్ టీమ్‌పై రెండేళ్లు నిషేధం పడగా.. గత ఏడాదే మళ్లీ ఐపీఎల్‌లోకి ఆ జట్టు పునరాగమనం చేసింది.

2018 ఐపీఎల్ సీజన్‌లో ఆ జట్టు నిరాశపరిచింది. బాల్ టాంపరింగ్ కారణంగా కెప్టెన్ స్టీవ్‌స్మిత్‌పై నిషేధం వేటు పడటంతో అతను గత సీజన్‌కి దూరమవడం ఆ జట్టు ప్రదర్శనని దారుణంగా దెబ్బతీసింది. ఈ ఏడాది కూడా గాయం కారణంగా అతను ఆడటంపై అనుమానాలు నెలకొన్న నేపథ్యంలో.. మళ్లీ పాత కోచ్‌ని తీసుకురావడం ద్వారా జట్టులో ఆత్మస్థైర్యాన్ని నింపాలని ఫ్రాంఛైజీ యోచిస్తోంది. ఈ మేరకు ప్యాడీ ఆప్టన్‌ని హెడ్ కోచ్‌గా నియమిస్తూ ఈరోజు నిర్ణయం తీసుకుంది.

భారత్ జట్టుకి కూడా 2008 నుంచి 2011 వరకూ సహాయ కోచ్‌గా ఆప్టన్ పనిచేశాడు. దీంతో.. ఆ అనుభవం కూడా అక్కరకొస్తుందని రాజస్థాన్ రాయల్స్ భావిస్తోంది. మార్చి 23 నుంచి ఐపీఎల్ 2019 సీజన్ ప్రారంభంకానుండగా.. మే రెండో వారంలో ముగిసే అవకాశముంది.