IPL 2020 ముంగిట ధోనీ.. 6, 6, 6, 6, 6

ఐపీఎల్ 2020 సీజన్ ముంగిట మహేంద్రసింగ్ ధోనీ సిక్సర్లు కొట్టడంపై ప్రత్యేక శ్రద్ధ కనబరుస్తున్నట్లు తెలుస్తోంది. ఇటీవల చెన్నైలో అడుగుపెట్టిన ధోనీ.. చిన్నస్వామి స్టేడియంలో సురేశ్ రైనాతో కలిసి నెట్స్‌లో ప్రాక్టీస్ చేస్తున్నాడు. తాజాగా నెట్స్‌లో ధోనీ వరుసగా ఐదు బంతుల్లో ఐదు సిక్సర్లు కొట్టిన వీడియో ఒకటి సోషల్ మీడియాలో వైరల్‌గా మారింది. ఐపీఎల్ బ్రాడ్‌కాస్టర్ స్టార్‌స్పోర్ట్స్.. ధోనీ 6,6,6,6,6 వీడియోని పోస్ట్ చేసింది.

2019 వన్డే ప్రపంచకప్ తర్వాత క్రికెట్‌కి దూరంగా ఉంటున్న ధోనీ.. కేవలం మూడు రోజుల వ్యవధిలోనే లయ అందుకున్నట్లు కనిపిస్తోంది. దాదాపు ఏడు నెలలు ఆటకి దూరంగా ఉన్నా.. ప్రాక్టీస్ సెషన్‌లో ధోనీ చక్కగా బంతిని బ్యాట్‌కి మిడిల్ చేస్తూ సిక్సర్లు బాదడం అందర్నీ ఆశ్చర్యపరుస్తోంది. ముఖ్యంగా.. ఆఫ్ స్టంప్‌కి వెలుపలగా పడిన బంతుల్ని ధోనీ చిన్నపాటి పాదాల కదలికలతో మిడ్‌వికెట్ దిశగా సిక్స్‌గా తరలించిన తీరు అతని బ్యాటింగ్ సామర్థ్యాన్ని మరోసారి స్పష్టం చేసింది. ఈ ఏడాది అక్టోబరులో జరిగే టీ20 ప్రపంచకప్‌లో ఆడాలని ధోనీ ఆశిస్తున్నాడు.


ఐపీఎల్ 2020 సీజన్ మార్చి 29 నుంచి ప్రారంభంకానుండగా.. తొలి మ్యాచ్‌లోనే డిఫెండింగ్ ఛాంపియన్‌ ముంబయి ఇండియన్స్‌తో చెన్నై సూపర్ కింగ్స్ ఢీకొట్టబోతోంది. చెన్నైకి ఇప్పటికే మూడు సార్లు టైటిల్ అందించిన ధోనీ.. ఈసారి కూడా టీమ్‌ని విజేతగా నిలపాలని ఉవ్విళ్లూరుతున్నాడు.