IPL 2020 ముంగిట హార్దిక్‌కి కోచ్ రిక్వెస్ట్..!

ఐపీఎల్ 2020 సీజన్ ముంగిట హార్దిక్ పాండ్యా కొన్ని మ్యాచ్‌లైనా ఆడాలని ముంబయి ఇండియన్స్ టీమ్ బౌలింగ్ కోచ్ షేన్ బాండ్ సూచించాడు. గత ఏడాది సెప్టెంబరులో ఆఖరిగా భారత్ తరఫున మ్యాచ్‌లు ఆడిన హార్దిక్ పాండ్యా.. ఆ తర్వాత వెన్ను గాయానికి సర్జరీ చేయించుకున్నాడు. నాలుగు నెలలు గడుస్తున్నా ఇప్పటికీ ఈ ఆల్‌రౌండర్ ఫిట్‌నెస్ సాధించలేకపోవడంతో.. భారత్ సెలక్టర్లు అతడ్ని పక్కనపెట్టేశారు. దీంతో.. నేరుగా ఐపీఎల్ 2020 సీజన్‌లో ముంబయి ఇండియన్స్ తరఫున మ్యాచ్‌లు ఆడేందుకు హార్దిక్ సిద్ధమవుతున్నాడు.

Read More: ముంబయి టీమ్‌లోకి అర్జున్ టెండూల్కర్

గాయం నుంచి కోలుకున్న తర్వాత ఎలాంటి మ్యాచ్‌లు ఆడకుండా నేరుగా ఐపీఎల్‌లో ఆడాలని హార్దిక్ నిర్ణయించుకోవడంపై కోచ్ షేన్ బాండ్ భిన్నాభిప్రాయం వ్యక్తం చేశాడు. ‘ఐపీఎల్‌కి ముందు అతను కొన్ని మ్యాచ్‌లు ఆడాలని నేను కోరుకుంటున్నా. అతని సామర్థ్యంపై నాకెలాంటి సందేహాల్లేవ్. కానీ.. గాయం నుంచి కోలుకుని నేరుగా వచ్చి ఐపీఎల్‌లో ఆడటం ఇబ్బందిగా అనిపించొచ్చు. అందుకే.. టోర్నీకి ముందు కొన్ని మ్యాచ్‌‌లు అతను ఆడితే బాగుంటుంది. ఫామ్ నిరూపించుకునేందుకు ఐపీఎల్ అతనికి ఓ మంచి వేదికకానుంది’ అని బాండ్ వెల్లడించాడు.

Read More: క్రికెట్ గతిని మార్చిన ముగ్గురు మొనగాళ్లు..!

హార్దిక్ పాండ్యా గాయంతో జట్టుకి దూరమవగా.. అతని స్థానంలో శివమ్ దూబే‌కి భారత సెలక్టర్లు అవకాశమిచ్చారు. కానీ.. వెస్టిండీస్‌తో ఓ హాఫ్ సెంచరీ మినహా ఈ దూబే చెప్పుకోదగ్గ ప్రదర్శన కనబర్చలేకపోయాడు. దీంతో.. హార్దిక్ పాండ్యా రీఎంట్రీ సుగమమైంది. కానీ.. అతను మ్యాచ్ ఫిట్‌నెస్ నిరూపించుకోవాల్సి ఉంది. భారత్ జట్టు న్యూజిలాండ్ పర్యటనకి ముందు ఫిట్‌నెస్ టెస్టులో పాండ్యా ఫెయిలైన విషయం తెలిసిందే.