వెయిట్ చేయలేం.. ఐపీఎల్‌కి బీసీసీఐ ప్రిపరేషన్స్ స్టార్ట్

ఐపీఎల్ 2020 సీజన్‌ నిర్వహణకి భారత క్రికెట్ నియంత్రణ మండలి (బీసీసీఐ) సన్నాహకాలు ప్రారంభించబోతోంది. ఆస్ట్రేలియా వేదికగా అక్టోబరు 18 నుంచి నవంబరు 15 వరకూ టీ20 వరల్డ్‌కప్ జరగాల్సి ఉండగా.. కరోనా వైరస్ కారణంగా ఆ టోర్నీని వాయిదా వేయాలని అంతర్జాతీయ క్రికెట్ కౌన్సిల్ (ఐసీసీ) భావిస్తోంది. కానీ వాయిదాపై తుది నిర్ణయాన్ని మాత్రం గత రెండు నెలలుగా ఐసీసీ వాయిదా వేస్తూనే ఉంది. దాంతో టీ20 వరల్డ్‌కప్ విండోలో ఐపీఎల్ 2020 సీజన్‌ని నిర్వహించాలని ఆశిస్తున్న బీసీసీఐ ఎటూ తేల్చుకోలేకపోతోంది. మరోవైపు క్రికెట్ ఆస్ట్రేలియా (సీఏ) కూడా వరల్డ్‌కప్ జరగడం అనుమానేమనంటూ.. ఇంగ్లాండ్‌తో టీ20 సిరీస్‌కి సిద్ధమవ్వాలని తమ క్రికెటర్లకి సమాచారం ఇచ్చినట్లు తెలుస్తోంది.

ఐపీఎల్ 2020 సీజన్ ఒకవేళ రద్దయితే బీసీసీఐ సుమారు రూ.4000 కోట్లు నష్టపోనుంది. ఈ నేపథ్యంలో.. ఎట్టి పరిస్థితుల్లో ఈ ఏడాది ఐపీఎల్ నిర్వహించాలనే పట్టుదలతో బీసీసీఐ ఉంది. కానీ ఒకవైపు ఐసీసీ నాన్చుడి ధోరణితో వ్యవహరిస్తుండగా.. మరోవైపు పాకిస్థాన్ క్రికెట్ బోర్డు (పీసీబీ) కూడా సెప్టెంబరు- నవంబరు మధ్యలో ఆసియా కప్ 2020, పాకిస్థాన్ సూపర్ లీగ్‌ని నిర్వహించాలని ప్లాన్ చేస్తోంది. మొత్తంగా.. ఐసీసీ, పీసీబీ టార్గెట్ ఐపీఎల్ 2020 సీజన్‌ మ్యాచ్‌లను అడ్డుకోవడమే.

భారత్‌లో కరోనా వైరస్ ఇంకా అదుపులోకి రాకపోవడంతో ఐపీఎల్‌ని శ్రీలంక లేదా యూఏఈలో నిర్వహించాలని ఇప్పటికే ప్రాథమికంగా బీసీసీఐ నిర్ణయించింది. కానీ.. షెడ్యూల్‌పై మాత్రం ఓ క్లారిటీకి రాలేకపోతోంది. పూర్తి స్థాయిలో టోర్నీని నిర్వహించాలంటే కనీసం 45 రోజుల విండో కావాలి. ఈ నేపథ్యంలో.. సెప్టెంబరు చివరి వారం నుంచి నవంబరు మొదటి వారం వరకూ ఉన్న విండోని బీసీసీఐ పరిశీలిస్తోంది. ఆ సమయంలో ఆస్ట్రేలియా, దక్షిణాఫ్రికా, ఇంగ్లాండ్ తదితర జట్లకి ఇంటర్నేషనల్ మ్యాచ్‌లు లేకుండా చూడాల్సిన బాధ్యత కూడా బీసీసీఐపైనే ఉంది.