కోహ్లీ 100 సెంచరీలు చేయగలడు.. కానీ..?: ఇర్ఫాన్ పఠాన్

క్రికెట్ దిగ్గజం సచిన్ టెండూల్కర్ నెలకొల్పిన 100 అంతర్జాతీయ శతకాల రికార్డ్‌ని భారత కెప్టెన్ విరాట్ కోహ్లీ బ్రేక్ చేయగలడని మాజీ ఫాస్ట్ బౌలర్ ఇర్ఫాన్ పఠాన్ జోస్యం చెప్పాడు. ఇప్పటికే వన్డే, టెస్టుల్లో కలిపి 70 సెంచరీలు నమోదు చేసిన విరాట్ కోహ్లీ.. గత మూడేళ్లుగా కెరీర్ బెస్ట్ ప్రదర్శనని కనబరుస్తున్నాడు. ఈ క్రమంలో ఇప్పటికే ఎన్నో రికార్డుల్ని బద్దలుకొట్టిన విరాట్.. రికార్డుల రారాజుగా అందరి నుంచి కితాబులు అందుకుంటున్నాడు.

సచిన్ టెండూల్కర్ సాధించిన 100 శతకాల్లో.. 49 సెంచరీలు వన్డేల్లో సాధించగా.. మిగిలిన 51 శతకాలు టెస్టుల్లో నమోదుచేశాడు. అయితే.. విరాట్ కోహ్లీ ఇప్పటికే వన్డేల్లో 43 సెంచరీల మైలురాయిని అందుకుని సచిన్ రికార్డ్‌కి చేరువకాగా.. టెస్టుల్లో అతను సాధించిన శతకాలు 27 మాత్రమే. దాంతో.. సచిన్ తరహాలో సుదీర్ఘంగా కెరీర్‌ని కోహ్లీ కొనసాగించగలిగితేనే 100 సెంచరీలు నమోదు చేయగలడని పఠాన్ చెప్పుకొచ్చాడు.

‘‘వన్డేల్లో సచిన్ అత్యధిక సెంచరీల (43) రికార్డ్‌ని బ్రేక్ చేయడం కోహ్లీకి సాధ్యమే. కానీ.. 100 సెంచరీల రికార్డ్‌ని బ్రేక్ చేయడం మాత్రం కష్టం. ఆ రికార్డ్ పూర్తిగా కోహ్లీ తన ఫిట్‌నెస్‌ని కాపాడుకుంటూ.. కెరీర్‌ని కొనసాగించడంపైనే ఆధారపడి ఉంది. ఒకవేళ సచిన్ తరహాలో సుదీర్ఘ కెరీర్‌ని (24 ఏళ్లు) కోహ్లీ కొనసాగించగలిగితే అతను ఆ 100 సెంచరీల రికార్డ్‌ని సాధించగలడు’’ అని ఇర్ఫాన్ పఠాన్ వెల్లడించాడు.