టీమిండియాకి మళ్లీ ఆడటమే నా కల..!

భారత్ జట్టులో ఆల్‌రౌండర్‌గా సంచలన ప్రదర్శనతో కొంతకాలం మెప్పించాడు ఇర్ఫాన్ పఠాన్. అప్పట్లో అతని జోరు చూసి.. దిగ్గజ ఆటగాడు కపిల్ దేవ్ స్థాయిని అందుకుంటాడని అంతా భావించారు. కానీ.. గాయాలు అతడి కెరీర్‌ని దెబ్బతీశాయి. వాటి నుంచి ప్రస్తుతం కోలుకున్నా.. టీమిండియాలో ఉన్న తీవ్రమైన పోటీని ఎదుర్కొని జట్టులోకి పునరాగమనం చేయలేక దేశవాళీ క్రికెట్‌కే పరిమితమయ్యాడు. అయితే.. భారత్ తరఫున మళ్లీ క్రికెట్ ఆడాలనేది తన కల అని ఇర్ఫాన్ పఠాన్ తాజాగా వెల్లడించాడు.

‘భారత్‌కి ఆడుతూ సాధించిన ఘనతల్ని ఒకవేళ నేను మర్చిపోయినా.. నా అభిమానులు మాత్రం మరిచిపోరు. అవి అంత గొప్పవి. అప్పుడప్పుడు వాళ్లే నాకు వాటిని గుర్తు చేస్తుంటారు. భారత్ జట్టులో పునరాగమనం అనేది నా కల. దాన్ని నెరవేర్చుకునేందుకు ఉన్న ఏకైక మార్గం.. దేశవాళీ మ్యాచ్‌ల్లో సత్తాచాటడమే. దానికోసమే ప్రస్తుతం నేను శ్రమిస్తున్నాను’ అని ఇర్ఫాన్ పఠాన్ వివరించాడు. 2012లో చివరిసారి ఈ క్రికెటర్ టీమిండియాకి ఆడాడు. ప్రస్తుతం జట్టులో హార్దిక్ పాండ్య ఆల్‌రౌండర్‌గా మెప్పిస్తున్న నేపథ్యంలో ఇర్ఫాన్ పునరాగమనం కష్టమనే చెప్పాలి..!