​ కోహ్లిని మాటలతో కాదు.. బౌలింగ్‌తో రెచ్చగొట్టండి

మైదానంలో భారత కెప్టెన్ విరాట్ కోహ్లిని మాటలతో కాకుండా.. బౌలింగ్‌తో విసిగించి ఔట్ చేయాలని ఆస్ట్రేలియా బౌలర్లకి ఆ దేశ మాజీ ఫాస్ట్ బౌలర్ జాసన్ గెలెస్పీ సూచించాడు. ఆదివారం నుంచి భారత్‌, ఆస్ట్రేలియా మధ్య ఐదు వన్డేల సిరీస్ ప్రారంభంకానున్న నేపథ్యంలో మీడియాతో గెలెస్పీ మాట్లాడాడు. మ్యాచ్‌లో స్లెడ్జింగ్‌కి దిగితే కోహ్లి బౌలర్లపై దూకుడు పెంచుతాడని.. అలా కాకుండా వరుసగా బౌన్సర్లు విసిరి అతను క్రీజులో వెనక్కి తగ్గేలా చేయాలని సూచించాడు. చెన్నైలోని చెపాక్ స్టేడియంలో ఆదివారం తొలి వన్డే జరగనుంది.

‘కోహ్లి అద్భుతమైన ఆటగాడు. పవర్ ప్లే తర్వాత ఫీల్డర్లు బ్యాట్స్‌మెన్‌కి దూరంగా వెళ్తే ఇక అతను స్వేచ్ఛగా పరుగులు రాబట్టేస్తాడు. ఈ వన్డే సిరీస్‌లో ఆస్ట్రేలియా ఆటగాళ్లు అతనితో మాటల యుద్ధానికి దిగతారని నేను అనుకోవడం లేదు. అతడ్ని నియంత్రించాలంటే వాగ్వాదానికి దిగకుండా.. మొదట క్రమశిక్షణతో బౌలింగ్ చేయాలి. బౌలర్లు క్రమం తప్పకుండా బౌన్సర్లు సంధిస్తే.. అతను క్రీజులో కొంచెం వెనక్కి తగ్గుతాడు. దీంతో అతనిపై క్రమంగా ఒత్తిడి పెరిగి.. క్రీజు వెలుపలికి వచ్చి బంతిని డ్రైవ్ చేసేందుకు ప్రయత్నిస్తాడు. ఇక్కడే ఆసీస్ అతడ్ని ఔట్ చేసే అవకాశాన్ని తెలివిగా వినియోగించుకోవాలి. ఆన్‌సైడ్‌లో ఇద్దరు ఫీల్డర్లని పెంచి.. వికెట్లను లక్ష్యంగా చేసుకుని బంతులు విసిరితే కచ్చితంగా కోహ్లిని బుట్టలో వేయచ్చు. కెప్టెన్ తక్కువ స్కోరుకి ఔటైతే.. టీమిండియాపై ఒత్తిడి పెరుగుతుంది’ అని గెలెస్పీ వివరించాడు.