రెండేళ్ల తర్వాత బుమ్రా బౌలింగ్‌లో కోహ్లీ ఔట్

భారత ఫాస్ట్ బౌలర్ జస్‌ప్రీత్ బుమ్రా నెట్స్‌లో తనని గాయపర్చేందుకు కూడా వెనుకాడటం లేదని కెప్టెన్ విరాట్ కోహ్లీ వెల్లడించాడు. ఆస్ట్రేలియాతో మంగళవారం నుంచి మూడు వన్డేల సిరీస్ ప్రారంభంకానుండగా.. ఈరోజు వాంఖడేలో ఏర్పాటు చేసిన నెట్ సెషన్స్‌లో టీమిండియా ప్రాక్టీస్ చేసింది.

బుమ్రా బౌలింగ్‌లో కాసేపు బ్యాటింగ్ చేసిన విరాట్ కోహ్లీ.. కొన్ని బంతుల్ని సమర్థంగా హిట్ చేసినా ఆఖర్లో బౌల్డయ్యాడట. ఈ విషయాన్ని స్వయంగా విరాట్ కోహ్లీనే మీడియాతో వెల్లడించాడు. మ్యాచ్ తరహాలోనే నెట్స్‌లోనూ అదే తీవ్రతతో బుమ్రా బౌలింగ్ చేస్తున్నాడని కితాబిచ్చిన కోహ్లీ.. 2018 తర్వాత మళ్లీ బుమ్రా బౌలింగ్‌లో తాను ఔటయ్యానని అంగీకరించాడు.


‘క్రికెట్ ప్రపంచంలోనే జస్‌ప్రీత్ బుమ్రా నా వరకూ బెస్ట్ బౌలర్. నెట్స్‌లోనూ అతను మ్యాచ్ తరహాలో సీరియస్‌గా బౌలింగ్ చేస్తాడు. ఎంతలా అంటే..? టీమిండియా టాప్ ఆర్డర్ బ్యాట్స్‌మెన్‌లను గాయపర్చేందుకు కూడా అతను వెనుకాడటం లేదు. గత నాలుగేళ్ల నుంచి బుమ్రా బౌలింగ్‌ని నెట్స్‌లో ఎదుర్కొంటున్నాను. అయితే.. ఈరోజు నేను రెండోసారి అతని బౌలింగ్‌లో ఔటయ్యాను. 2018లో అడిలైడ్‌లో తొలిసారి అతనికి వికెట్ చేజార్చుకున్న నేను.. మళ్లీ ఇన్నాళ్లకి ఔటయ్యా’ అని కోహ్లీ వెల్లడించాడు.