బుమ్రా కళ్లు చెదిరే ఫీల్డింగ్ విన్యాసం.. కానీ?

దక్షిణాఫ్రికాతో జరిగిన తొలి టీ20 మ్యాచ్‌లో జస్ప్రీత్ బుమ్రా అద్భుత ఫీల్డింగ్ విన్యాసంతో అలరించాడు. పాండ్య విసిరిన బంతిని మిల్లర్ బలంగా బాదగా.. బౌండరీ లైన్ దగ్గరున్న బుమ్రా ఆ బంతిని అందుకోవడానికి విఫల యత్నం చేశాడు. అమాంతం గాల్లోకి ఎగిరి బంతిని అందుకున్నప్పటికీ.. బౌండరీ లైన్ ఆవల పడిపోయే ఛాన్స్ ఉండటంతో మైదానంలోకి బంతిని విసిరి కింద పడిపోయాడు. బంతి సిక్స్ వెళ్లకుండా బుమ్రా చేసిన ప్రయత్నం అందర్నీ ఆకట్టుకుంది.

బుమ్రా బంతిని అందుకునే ముందు అతడి పాదం బౌండరీ లైన్‌ను తాకింది. తర్వాత గాల్లోకి ఎగిరిన బుమ్రా.. బంతిని అందుకొని.. తిరిగి నేలను తాకేలోగానే విసిరేశాడు. కానీ అంపైర్ దాన్ని సిక్స్ ఇచ్చాడు. కొత్త నిబంధనల ప్రకారం ఫీల్డర్ బంతిని టచ్ చేసే ముందు బౌండరీ లైన్ తాకొద్దు. కానీ బుమ్రా లెగ్ బౌండరీ లైన్‌ను తాకింది. అంపైర్ దాన్ని సిక్సర్‌గా ప్రకటించినప్పటికీ.. బుమ్రా ప్రయత్నం మాత్రం నెటిజన్ల మనసు దోచింది.