జయంత్‌కు గాయం.. ఆ ప్లేయర్‌కు కలిసొచ్చేనా?

జనవరి 15 నుంచి ఇంగ్లండ్‌తో ప్రారంభం కానున్న పరిమిత ఓవర్ల క్రికెట్‌కు భారత ఆల్‌రౌండర్ జయంత్ యాదవ్ దూరం కానున్నాడు. అతడితోపాటు స్పిన్నర్ అక్షర్ పటేల్ కూడా ఇంగ్లండ్‌తో వన్డే, టీ20లకు దూరం కానున్నాడు. ముంబై టెస్టులో తొమ్మిదోస్థానంలో బ్యాటింగ్‌కు దిగిన జయంత్ సెంచరీ చేశాడు. ఈ ఘనత సాధించిన తొలి భారత బ్యాట్స్‌మెన్‌గా అతడు రికార్డు నెలకొల్పాడు. అయితే ఈ క్రికెటర్‌ను మోకాలి గాయం వేధిస్తోంది. ఈ సమస్య కారణంగానే జయంత్ చెన్నై టెస్టుకు దూరం కాగా.. ఇప్పుడు మిగతా మ్యాచ్‌లకు కూడా దూరమయ్యే అవకాశం ఉంది.

చెన్నైలో జరిగిన చివరి టెస్టులో అశ్విన్ బౌలింగ్ లో డాసన్ క్యాచ్ను పట్టే క్రమంలో అక్షర్ చేతి వేలికి గాయమైంది. అది తగ్గకపోవడంతో పరిమిత ఓవర్ల క్రికెట్ సిరీస్కు అక్షర్‌ను ఎంపిక చేసే అవకాశాల్లేవు. టీమిండియా స్టార్ ప్లేయర్లు రోహిత్ శర్మ, అజింక్య రహానే, మహ్మద్ షమీలను గాయాల సమస్య వేధిస్తోన్న సంగతి తెలిసిందే. రోహిత్‌కు లండన్లో శస్త్రచికిత్స జరగ్గా.. రహానే ముంబై, చెన్నైల్లో జరిగిన చివరి రెండు టెస్టులకు దూరమయ్యాడు. గాయపడిన ఆటగాళ్ల స్థానాలను భర్తీ చేయడానికి ప్రస్తుతం టీమిండియా సెలక్టర్లు కసరత్తు చేస్తున్నారు.

ఆస్ట్రేలియాతో కీలకమైన టెస్టు సిరీస్‌ను దృష్టిలో ఉంచుకొని ఇంగ్లండ్‌తో పరిమిత ఓవర్ల సిరీస్‌లో అశ్విన్‌, జడేజాకు విశ్రాంతి ఇవ్వాలని బీసీసీఐ భావిస్తోంది. ఇతర స్పిన్నర్లు అక్షర్ పటేల్, జయంత్ యాదవ్‌లు కూడా గాయాల కారణంగా అనూహ్యంగా దూరం కావడంతో భారం అమిత్ మిశ్రాపై పడనుంది మరో స్పిన్నర్‌గా ఉత్తర ప్రదేశ్‌కు చెందిన చైనామన్ బౌలర్ కులదీప్ యాదవ్‌కు చోటు దక్కే అవకాశాలున్నాయి. 22 ఏళ్ల కులదీప్ 8 రంజీ మ్యాచ్‌ల్లో 35 వికెట్లు తీయడంతోపాటు 466 రన్స్ చేశాడు. జట్టు ఎంపిక కోసం జనవరి 5, 6 తేదీల్లో ముంబైలో సమావేశం కానున్న సెలక్టర్లు కులదీప్‌ను తీసుకుంటారా? లేదా అనుభవం ఉన్న రవీంద్ర జడేజాను టీంలోకి తీసుకుంటారా? మరి కొద్ది రోజుల్లో విషయం తేలనుంది.