పాంటింగ్‌ కోసం నా స్టైల్ మార్చుకోవాలా..?

ఆస్ట్రేలియా మాజీ కెప్టెన్ రికీ పాంటింగ్ చేసిన ‘చిన్న పిల్లాడు’ వ్యాఖ్యలు దుమారం రేపుతున్నాయి. యాషెస్ సిరీస్‌ని 0-3తో ఇంగ్లాండ్ చేజార్చుకోవడంతో మీడియా సమావేశంలో ఆ జట్టు కెప్టెన్ జో రూట్ చిన్న పిల్లాడిలా కారణాలు చెప్పాడంటూ పాంటింగ్ ఎద్దేవా చేశాడు. ఈ వ్యాఖ్యలపై జో రూట్ ఘాటుగా స్పందించాడు. అతనికి ఇంగ్లాండ్ జట్టు, డ్రెస్సింగ్ రూము వాతావరణం గురించి ఏం తెలుసని ఆ వ్యంగ్య వ్యాఖ్యలు చేశాడు..? అని రూట్ ప్రశ్నించాడు.

‘రికీ పాంటింగ్ అతని అభిప్రాయాన్ని చెప్పాడు. కానీ.. ఇంగ్లాండ్ జట్టుతో లేదా డ్రెస్సింగ్‌ రూములో ఒక క్షణమైనా అతను గడిపాడా..? లేదు కదా..? కాబట్టి అతని మాటల్ని నేను పట్టించుకోవాల్సిన అవసరం లేదు. చిన్నపిల్లాడిలా మాట్లాడానని అంటున్నాడు కదా..? అది నా తీరు. నాకు తెలియని భావ వ్యక్తీకరణని మీడియా ముందు ఎవరి కోసమో ప్రయత్నించాల్సిన అగత్యం నాకు లేదు. జట్టుని ముందుండి ఎలా నడిపించాలో నాకు తెలుసు’ అని ఘాటుగా బదులిచ్చాడు