బట్లర్ ‘ర్యాంప్ షాట్’ అదరహో.. వీడియో

పరిమిత ఓవర్ల క్రికెట్‌లో ర్యాంప్ షాట్లతో హోరెత్తించే ఇంగ్లాండ్ ఓపెనర్ జోస్ బట్లర్ మరోసారి తన కళాత్మక షాట్‌తో వార్తల్లో నిలిచాడు. ఐపీఎల్ తరహాలో ఆస్ట్రేలియాలో జరుగుతున్న బిగ్‌బాష్ టీ20 లీగ్‌లో ర్యాంప్‌ షాట్‌తో బంతిని స్టాండ్స్‌లోకి తరలించి అభిమానుల్ని మురిపించాడు. ఈ మ్యాచ్‌లో సిడ్నీ థండర్స్ తరఫున బరిలోకి దిగిన బట్లర్ (81: 43 బంతుల్లో 7x4, 5x6) మెరుపు అర్ధశతకం బాదినా.. అతని జట్టు 9 పరుగుల తేడాతో ఓటమి చవిచూసింది. ప్రత్యర్థి హోబర్ట్ హరికేన్స్ జట్టు నిర్దేశించిన 189 పరుగుల లక్ష్యాన్ని ఛేదించే క్రమంలో బట్లర్ చివరి ఓవర్‌లో జట్టు స్కోరు 167 వద్ద అనూహ్యంగా రనౌటయ్యాడు. దీంతో సిడ్నీ థండర్స్ నిర్ణీత 20 ఓవర్లలో 180/8కే పరిమితమైంది.

ఇంగ్లాండ్ జట్టులో సహచరుడు, హోబర్ట్ జట్టు బౌలర్ మిల్స్ వేసిన ఇన్నింగ్స్ నాలుగో ఓవర్‌లో బట్లర్ బాదిన సిక్స్ మ్యాచ్‌కే హైలెట్‌గా నిలిచింది. ఆఫ్‌స్టంప్‌కి దూరంగా విసిరిన బంతిని.. వైడ్‌ లైన్‌పై పడిపోతూ ర్యాంప్ షాట్ ఆడేశాడు. స్కూప్, లాప్ట్‌ షాట్లని మేళవించి బట్లర్ బాదిన ఈ సిక్సర్‌కి అందరూ ఫిదా అయిపోయారు. ఈ ఓవర్‌లోనే మరో సిక్సర్‌ కూడా బాదిన బట్లర్.. జట్టుని మాత్రం గెలిపించుకోలేకపోయాడు.
The most outrageous shot of #BBL07 from @josbuttler? He talks us through his mastery of it... pic.twitter.com/1StEE5bKNt — cricket.com.au (@CricketAus) January 2, 2018