ఆల్ టైం టాప్-10 క్రికెటర్లలో కోహ్లి ఒకడు

ప్రస్తుత క్రికెట్లోని అత్యుత్తమ బ్యాట్స్‌మెన్‌లలో విరాట్ కోహ్లి ఒకడు. ఫార్మాట్ ఏదైనా.. కోహ్లి దూకుడుతో ప్రత్యర్థి బౌలర్లు డిఫెన్స్‌లో పడిపోవాల్సిందే. వన్డేల్లో 35 సెంచరీలు బాదిన కోహ్లి కంటే సచిన్ (49) మాత్రమే ముందున్నాడు. విరాట్ శతకాల్లో 21 లక్ష్య ఛేదనలో చేసినవే కావడం విశేషం. 211 వన్డేల్లో 9779 రన్స్ చేసిన కోహ్లి 58.20 సగటుతో పరుగులు రాబట్టాడు. టీ20ల్లో 2102 రన్స్ చేసిన కోహ్లి 48.88 సగటుతో పరుగులు చేశాడు. టెస్టుల్లో అతడి యావరేజ్ 53.40గా ఉంది. లాంగ్ ఫార్మాట్లో విరాట్ 21 శతకాలు బాదాడు. వీటిలో 6 డబుల్ సెంచరీలు ఉండటం గమనార్హం.

ఈ గణాంకాలు చాలు కోహ్లి గొప్పదనాన్ని చాటడానికి. భారత విజయాల్లో కీలక పాత్ర పోషిస్తోన్న కోహ్లి ఆల్ టైం టాప్-10 ఆటగాళ్లలో ఒకడని దిగ్గజ ఆల్‌రౌండర్ కపిల్ దేవ్ ప్రశంసించాడు. 200 ఏళ్ల క్రికెట్ చరిత్రలో సచిన్, గావస్కర్‌ల సరసన విరాట్ పేరును చేర్చొచ్చని కపిల్ తెలిపాడు.

టీమిండియా విజయాల్లో బౌలర్ల పాత్ర గురించి ప్రస్తావించగా.. అశ్విన్ కీలక పాత్ర పోషించాడని కపిల్ దేవ్ చెప్పుకొచ్చాడు. విదేశాల్లోనూ అతడు రాణిస్తాడనే ఆశాభావాన్ని ఈ మాజీ కెప్టెన్ వ్యక్తం చేశాడు. గత 150 ఏళ్ల క్రికెట్ చరిత్రలో ఏ బౌలరూ తక్కువ టైంలో అశ్విన్‌‌లా ఎక్కువ వికెట్లు తీయలేదంటూ.. ఆఫ్ స్పిన్నర్‌పై కపిల్ దేవ్ ప్రశంసలు గుప్పించాడు.