కళ్లుచెదిరే క్యాచ్ అందుకున్న కేదార్..!

శ్రీలంకతో దంబుల్లా వేదికగా జరుగుతున్న తొలి వన్డేలో భారత ఫీల్డర్ కేదార్ జాదవ్ కళ్లు చెదిరే రీతిలో క్యాచ్ అందుకున్నాడు. ఇన్నింగ్స్‌ 35వ ఓవర్ వేసిన అక్షర్‌ పటేల్ బౌలింగ్‌లో శ్రీలంక బ్యాట్స్‌మెన్ హసరంగ (2) భారీ షాట్ ఆడాడు. బంతి లాంగాన్‌లో చాలా ఎత్తుకి లేచింది. అందరూ.. అది సిక్స్‌గా వెళ్తోందని ఊహించారు. కానీ.. బంతి లాంగాన్‌లోని బౌండరీ లైన్‌కి లోపలే కిందకి పడుతుండటంతో.. మిడాన్‌లో ఫీల్డింగ్ చేస్తున్న కేదార్ జాదవ్ స్పందించాడు.

మిడాన్ నుంచి వేగంగా బంతిని చూస్తూ అలానే వెనక్కి వెళ్లిన జాదవ్.. ఏ మాత్రం తడబడకుండా చివరి క్షణంలో డైవ్ చేస్తూ బంతిని క్యాచ్‌గా అందుకున్నాడు. సాధారణంగా ఫీల్డర్ మైదానంలో ఎంత దూరమైనా.. ముందుకు వెళ్లి అలవోకగా క్యాచ్ అందుకోగలడు. కానీ.. వెనక్కి వెళ్తూ.. అదీ ఎక్కువ ఎత్తు నుంచి వస్తున్న బంతి గమనాన్ని పరిశీలిస్తూ అందుకోవడం అంత సులువు కాదు. క్యాచ్ అందుకున్న తర్వాత.. పట్టుతప్పి కేదార్ వెనక్కి అలానే పడిపోయాడు. కానీ.. బంతిని వదల్లేదు.