ఆ క్రెడిట్ అంతా ధోనీదే : కేదార్ జాదవ్

ప్రస్తుతం జరుగుతున్న ఆసియా కప్‌లో టీమిండియా క్రికెటర్ కేదార్ జాదవ్ బంతితోనూ రాణిస్తున్నాడు. అయితే తన విజయం వెనుక మాజీ కెప్టెన్ ఎంఎస్ ధోనీ పాత్ర కీలకమని అభిప్రాయపడ్డాడు. స్వదేశంలో 2016లో న్యూజిలాండ్‌తో వన్డే సిరీస్‌లో ధోని తన చేతికి బంతిని ఇవ్వడం కెరీర్‌నే మార్చివేసిందన్నాడు. అప్పటి నుంచి తన ఆటతో పాటు వ్యక్తిత్వంలోనూ మార్పు వచ్చిందని చెప్పాడు.

ఆసియా కప్‌లో నేడు బంగ్లాదేశ్‌తో మ్యాచ్ సందర్భంగా కేదార్ జాదవ్ మీడియాతో మాట్లాడాడు. ‘గతంలో నా ఫోకస్ అంతా బ్యాటింగ్‌పైనే ఉండేది. నాపై నాకు అంత నమ్మకం ఉండేది కాదు. రెండేళ్ల కిందట కివీస్‌తో జరిగిన సిరీస్‌తో నా దశ తిరిగింది. బౌలింగ్ చేయాలంటూ ధోనీ బంతిని అందించడం నా జీవితాన్నే మార్చేసింది. నాపై నాకు మరింత నమ్మకం పెరిగింది. ఆత్మ విశ్వాసంతో ఆడుతున్నా. వికెట్ టు వికెట్ బంతులు సంధించి ఫలితాలు సాధిస్తున్నాను.

ధోనీ ఇచ్చిన సహకారం, ప్రోత్సాహంతోనే నా ఆటతీరు మెరుగైంది. పూర్తి స్వేచ్ఛగా క్రికెట్‌ను ఆస్వాదిస్తున్నాను. కేవలం రెండు ఓవర్లకు మించి ఎక్కువ ఓవర్లు నెట్స్‌లో ప్రాక్టీస్ చేయను. కానీ మ్యాచ్‌లో పూర్తిస్థాయి ప్రదర్శణ చేయడమే నా లక్ష్యం. గత 6 నెలల్లో మూడుసార్లు గాయాలపాలయ్యా. అయితే తాజాగా చేసిన సర్జరీ తర్వాత నా ఫిట్‌నెస్ మెరుగైంది. ధోనీలాంటి సీనియర్లతో ఆటతో పాటు ఆరోగ్య సూత్రాలు నేర్చుకోవడం తనకు అలవాటు అని’ కేదార్ జాదవ్ చెప్పుకొచ్చాడు.