కీరన్ పొలార్డ్ పవర్.. సీపీఎల్ 2020లో ఒంటిచేత్తో సిక్సర్లు (వీడియో)

వెస్టిండీస్ పవర్ హిట్టర్ కీరన్ పొలార్డ్.. టీ20ల్లో తాను ఎంత ప్రమాదకర బ్యాట్స్‌మెనో..? మరోసారి క్రికెట్ అభిమానులకి గుర్తు చేశాడు. విండీస్ గడ్డపై జరుగుతున్న కరీబియన్ ప్రీమియర్ లీగ్ 2020 సీజన్‌లో కెప్టెన్‌గా ట్రిన్‌బాగో నైట్‌రైడర్స్ టీమ్‌ని నడిపిస్తున్న కీరన్ పొలార్డ్.. తాజాగా బార్బడోస్ ట్రైడెంట్స్‌తో జరిగిన మ్యాచ్‌లో భారీ సిక్సర్లతో చెలరేగిపోయాడు. ఇన్నింగ్స్ 14వ ఓవర్‌లో క్రీజులోకి వచ్చిన కీరన్ పొలార్డ్ 17 బంతులు ఎదుర్కొని ఒక ఫోర్, నాలుగు సిక్సర్ల సాయంతో ఏకంగా 41 పరుగులతో అజేయంగా చేశాడు. ఇందులో ఓ రెండు సిక్సర్లని ఒంటిచేత్తో ఈ కరీబియన్ హిట్టర్ బాదడం గమనార్హం.

మ్యాచ్‌లో తొలుత బ్యాటింగ్ చేసిన ట్రిన్‌బాగో నైట్‌రైడర్స్.. కొలిన్ మున్రో (50: 30 బంతుల్లో 7x4, 2x6), డారెన్ బ్రావో (54 నాటౌట్: 36 బంతుల్లో 4x4, 4x6)తో పాటు కీరన్ పొలార్డ్ దూకుడుగా ఆడటంతో 3 వికెట్ల నష్టానికి 185 పరుగులు చేసింది. అనంతరం ఛేదనలో తడబడిన బార్బడోస్ టీమ్ 166/6కే పరిమితమవగా.. 19 పరుగుల తేడాతో నైట్‌రైడర్స్ గెలుపొందింది.


ఇన్నింగ్స్ 17వ ఓవర్ ఆఖరి బంతిని ఆఫ్ స్టంప్‌కి వెలుపలగా ఊరిస్తూ స్పిన్నర్ మిచెల్ శాంట్నర్ సంధించగా.. దాన్ని ఒంటిచేత్తో లాంగాఫ్ దిశగా స్టాండ్స్‌లోకి కీరన్ పొలార్డ్ కొట్టేశాడు. ఆ తర్వాత ఓవర్ ఆఖరి బంతిని ఫాస్ట్ బౌలర్ రైఫర్ ఆఫ్ స్టంప్‌‌కి కొద్దిగా వెలుపల వేయగా.. దాన్ని కూడా ఒంటిచేత్తో ఈసారి లాంగాన్ దిశగా సిక్స్‌గా పొలార్డ్ మలిచేశాడు. ఐపీఎల్ 2020 సీజన్‌లో ముంబయి ఇండియన్స్ టీమ్‌కి కీరన్ పొలార్డ్ ఆడనుండగా.. యూఏఈ వేదికగా సెప్టెంబరు 19 నుంచి టోర్నీ ప్రారంభంకానుంది.