కోల్‌కతా కెప్టెన్‌గా కార్తీక్‌కే అవకాశం ఎందుకంటే?

ఈ ఏడాది ఐపీఎల్ సీజన్ ప్రారంభానికి ముందే ఫ్రాంచైజీలు కెప్టెన్ల ఎంపికతో వార్తల్లో నిలుస్తున్నాయి. ముందుగా రాజస్థాన్ రాయల్స్ స్టీవ్ స్మిత్‌ను కెప్టెన్‌గా ఎన్నుకోగా.. కింగ్స్ ఎలెవన్ పంజాబ్ విభిన్న తరహాలో అశ్విన్‌ను కెప్టెన్‌ను ప్రకటించింది. తాజాగా కోల్‌కతా నైట్‌ రైడర్స్ ఆదివారం తమ కెప్టెన్‌ను ఎంపిక చేసింది. ఈ సీజన్లో దినేశ్ కార్తీక్ తమ జట్టును ముందుకు నడిపిస్తాడని నైట్‌రైడర్స్ సీఈవో వెంకీ మైసూర్ తెలిపారు. స్టార్ స్పోర్ట్స్ టీవీ షో ద్వారా ఆయన కెప్టెన్ పేరును ప్రకటించారు.

గౌతమ్ గంభీర్ ఢిల్లీ డేర్ డెవిల్స్‌కు మారడంతో అతడి స్థానాన్ని భర్తీ చేసేలా.. దీర్ఘకాలిక దృష్టితో దినేశ్ కార్తీక్‌కు నాయకత్వ పగ్గాలు అప్పగించామని వెంకీ చెప్పారు. క్రిస్ లిన్, రాబిన్ ఉతప్ప లాంటి సీనియర్లు కెప్టెన్సీ రేసులో ఉన్నప్పటికీ.. వారిని కాదని కార్తీక్‌కు అవకాశం కల్పించారు. ఉతప్పను వైస్ కెప్టెన్‌గా నియమించారు. అండర్-17 క్రికెట్ ఆడే రోజుల నుంచి కార్తీక్, ఉతప్ప మధ్య స్నేహం ఉంది. అది కూడా జట్టుకు ఉపకరించనుంది. వికెట్ కీపర్లయిన వీరిద్దరూ కోల్‌కతాను ముందుకు నడపనున్నారు.

జనవరిలో నిర్వహించిన వేలంలో కోల్‌కతా ఫ్రాంచైజీ రూ.7.4 కోట్లు వెచ్చించి దినేశ్ కార్తీక్‌ను కొనుగోలు చేసింది. గత పదేళ్లుగా నిలకడగా రాణిస్తోన్న జట్టుకు కెప్టెన్‌గా ఎంపికవడం ఎంతో ఆనందంగా ఉందని కార్తీక్ తెలిపాడు. తొలి సీజన్లో ఢిల్లీ తరఫున ఆడిన దినేశ్ కార్తీక్.. గత రెండు సీజన్లలో ఫుణే తరఫున బరిలో దిగాడు.