పెళ్లి చేసుకుని.. రిసెప్షన్‌లో భార్యతో క్రికెట్ ఆడిన KKR స్పిన్నర్

ఐపీఎల్‌లో కోల్‌కతా నైట్‌రైడర్స్ మిస్టరీ స్పిన్నర్ వరుణ్ చక్రవర్తి ఓ ఇంటివాడయ్యాడు. సుదీర్ఘకాలంగా నేహాతో ప్రేమాయణం నడుపుతున్న వరుణ్ చక్రవర్తి తాజాగా పెద్దల సమక్షంలో ఆమెని పెళ్లి చేసుకున్నాడు. ఈ మేరకు ఓ వీడియోని కోల్‌కతా నైట్‌రైడర్స్ ఫ్రాంఛైజీ విడుదల చేస్తూ.. నూతన దంపతులకి శుభాకాంక్షలు తెలియజేసింది. రిసెప్షన్‌ వేదికపై వరుణ్ చక్రవర్తి బంతి విసరగా.. అతని భార్య నేహా బ్యాటింగ్ చేస్తుండటం వీడియోలో కనిపించింది.


ఐపీఎల్ 2019 సీజన్‌ వేలంలో రూ. 8.4 కోట్లకి వరుణ్ చక్రవర్తిని కింగ్స్ ఎలెవన్ పంజాబ్ ఫ్రాంఛైజీ కొనుగోలు చేసింది. కానీ.. ఆ ఏడాది ఈ స్పిన్నర్‌కి నిరాశే ఎదురైంది. దాంతో.. ఐపీఎల్ 2020 సీజన్‌ ముంగిట వేలంలోకి అతడ్ని పంజాబ్ వదిలేయగా.. కోల్‌కతా నైట్‌రైడర్స్ ఫ్రాంఛైజీ ఈసారి రూ.4 కోట్లకే కొనుగోలు చేసింది. అయినప్పటికీ.. అద్వితీయ ప్రదర్శనతో ఆకట్టుకున్న వరుణ్ చక్రవర్తి 6.84 ఎకానమీతో బౌలింగ్ చేసి 17 వికెట్లు పడగొట్టాడు. ఢిల్లీ క్యాపిటల్స్‌తో జరిగిన ఓ మ్యాచ్‌లో ఏకంగా ఐదు వికెట్లని వరుణ్ పడగొట్టాడు. దాంతో.. భారత సెలెక్టర్ల నుంచి కూడా పిలుపు వచ్చింది.

ఆస్ట్రేలియాతో ఇటీవల ముగిసిన టీ20 సిరీస్‌కి తొలుత వరుణ్ చక్రవర్తిని ఎంపిక చేశారు. కానీ.. గాయం కారణంగా..అతడ్ని తప్పించిన భారత సెలెక్టర్లు.. ఫాస్ట్ బౌలర్ టి. నటరాజన్‌‌కి ఆ అవకాశం కల్పించారు.