కోహ్లి తప్పిదాలను ఎత్తి చూపేదెవరు?: వీరూ

భారత మాజీ క్రికెటర్ వీరేంద్ర సెహ్వాగ్ మరోసారి కోహ్లిపై విమర్శలు గుప్పించాడు. విరాట్ బ్యాటింగ్‌ను పొగుడుతూనే.. కెప్టెన్సీపై వీరూ చురకలు అంటించాడు. గతంలో జట్టు ఎంపిక తీరును తప్పుబట్టిన వీరూ.. కెప్టెన్‌గా కోహ్లి చేస్తున్న తప్పిదాలను వేలెత్తి చూపే స్థాయి ఆటగాళ్లే జట్టులో కరవయ్యారని వాపోయాడు. మైదానంలో కోహ్లి చేస్తున్న తప్పిదాలను ఎత్తి చూపడానికి కొందరు ఆటగాళ్లు కావాలని సెహ్వాగ్ అభిప్రాయపడ్డాడు.

ప్రతి జట్టులో కెప్టెన్‌కు సలహాలు ఇవ్వడానికి నలుగురు లేదా ఐదుగురు ఆటగాళ్లు ఉంటారు. మైదానంలో తప్పిదాలు చేయకుండా ఈ ఆటగాళ్లు సాయం చేస్తుంటారు. కానీ ప్రస్తుత జట్టులో ఆ పరిస్థితి కనిపించడం లేదు. కోహ్లి ఎవరినైనా ఎంపిక చేస్తే.. అతడి నిర్ణయాన్ని తప్పుబట్టడానికి డ్రెస్సింగ్ రూంలో ఎవరూ లేరు. అతడి స్థాయికి తగ్గ ఆటగాడెవరూ జట్టులో లేరని వీరూ ఆవేదన వ్యక్తం చేశాడు.

కోహ్లి ఇబ్బందికర పరిస్థితుల్లోనూ ఆడగలిగే స్థాయికి చేరుకున్నాడు. ఇతర ఆటగాళ్ల నుంచి కూడా తను అదే తరహా ఆటతీరు కోరుకుంటున్నాడు. కానీ వారు అంచనాలను అందుకోలేక పోతుండటంతో కోహ్లి కెప్టెన్సీపై ప్రభావం చూపుతోంది. మిగతా ఆటగాళ్లు కూడా కోహ్లిలా ఎలాంటి బెరుకు లేకుండా ఆడాలని వీరూ సూచించాడు.

మిగతా ఆటగాళ్లు కూడా తనలా పరుగులు రాబట్టాలని కోహ్లి అడుగుతున్నాడు. అందులో తప్పేం లేదు. సచిన్ కెప్టెన్‌గా ఉన్నప్పుడు కూడా ఇలాగే జరిగేది. నేను పరుగులు రాబడుతున్నప్పుడు మీరేందుకు రన్స్ చేయలేకపోతున్నారని సచిన్ మమ్మల్ని ప్రశ్నించేవాడని వీరూ తెలిపాడు. కోచ్ నుంచి కోహ్లి సలహాలు పొందుతున్నప్పటికీ.. వాటిని మైదానంలో అమలు చేయలేకపోతున్నారని సెహ్వాగ్ అభిప్రాయపడ్డాడు. ఒక్క ఆటగాడే జట్టును గెలిపించలేడు.. అందరూ సమష్టిగా రాణిస్తే గెలవగలం అని వీరూ స్పష్టం చేశాడు.