కోతి మాట.. మలింగపై ఏడాది నిషేధం..!

ఛాంపియన్స్ ట్రోఫీలో శ్రీలంక పేలవ ప్రదర్శనపై విమర్శించిన ఆ దేశ క్రీడల మంత్రిని కోతితో పోల్చినందుకు ఫాస్ట్ బౌలర్ లసిత్ మలింగపై ఏడాది పాటు నిషేధం వేటు పడింది. ఫిటెనెస్ లేకపోవడంతో పాకిస్థాన్‌తో మ్యాచ్‌లో శ్రీలంక ఓడిపోయిందని క్రీడల మంత్రి దయాసిరి జయశేఖర పెదవి విరిచారు. దీనిపై ఘాటుగా స్పందించిన మలింగ ‘చిలుకలు చెట్టు తొర్రలో ఏర్పాటు చేసుకున్న గూటిలోకి కోతి వచ్చి మాట్లాడినట్లుంది’ అని వివాదాస్పద రీతిలో మాట్లాడాడు.

మలింగ మాటలపై విచారణకి ఆదేశించిన శ్రీలంక క్రికెట్ బోర్డు.. అతనిది తప్పు అని తేలడంతో ఏడాది పాటు నిషేధం విధించింది. అంతేకాకుండా తొలి వన్డే మ్యాచ్‌ ఫీజులో కూడా 50 శాతం కోత విధిస్తున్నట్లు ప్రకటించింది. మరికొద్ది రోజుల్లోనే జింబాబ్వే జట్టుతో శ్రీలంక సొంతగడ్డపై సిరీస్ ఆడనుంది. అనంతరం భారత్ జట్టు శ్రీలంకలో పర్యటించనున్న నేపథ్యంలో మలింగ శిక్షను ఆరు నెలల పాటు సస్పెన్షన్‌లో ఉంచనుంది.