కరోనాపై భారత్ గెలుస్తుంది: లెజెండరీ కెప్టెన్

ప్రపంచాన్ని వణికిస్తున్న కరోనా వైరస్‌పై పోరులో భారత్ విజయం సాధిస్తుందని దిగ్గజ సారథి క‌పిల్ దేవ్‌ వ్యాఖ్యానించాడు. సంక్షోభం నెలకొన్న ప్రస్తుత పరిస్థితుల్లో ప్రతి ఒక్కరు ఇంట్లోనే ఉండాలని విజ్ఞ‌ప్తి చేశాడు. వైర‌స్‌పై పోరులో ప్రభుత్వానికి ఈ విధంగా సహాయ సహకారాలు అందించాలని పేర్కొన్నాడు. ఇక దేశవ్యాప్తంగా చాపకింద నీరులా వైరస్ విస్త‌రిస్తున్న‌ సంగతి తెలిసిందే. ఇప్పటి వరకు దేశ‌వ్యాప్తంగా ఏడు వందల మందికిపైగా క‌రోనా పాజిటివ్‌గా తేలారు. సుమారు 21 మంది మరణించారు.

Read Also: ప్రపంచకప్‌న‌కు ముందు ఐపీఎల్లో ఆడ‌టం ముఖ్యం

క‌రోనా కారణంగా దొరికిన విశ్రాంతిని కుటుంబ సభ్యులతో గడపడానికి ఉపయోగించాలని కపిల్ సూచించాడు. తాను ఇంటి పనులను చేస్తూ, కుటుంబ సభ్యులతో సన్నిహితంగా మెలుగుతున్నాన‌ని పేర్కొన్నాడు. నిజానికి ఈ సమయంలో తన ఇంటి వంట మనిషిని వద్దని చెప్పి, తానే వంట చేస్తున్న‌ట్లు తెలిపాడు. అలాగే ఇంటిని శుభ్రపరచడంతోపాటు, గార్డెన్ కూడా నీట్‌గా ఉంచుతున్న‌ట్లు పేర్కొన్నాడు. ఇక త‌న ఇంటి ఆవ‌ర‌ణ‌లోని చిన్న‌ మైదానంలో గోల్ఫ్ ఆడుతున్నట్లు తెలిపాడు. ప్రభుత్వ మార్గదర్శకాలకు అనుగుణంగా ప్రజలందరూ వ్యవహరిస్తే, కరోనా వైరస్‌పై విజయం సాధించవచ్చని పేర్కొన్నాడు.

Read Also: క్వారంటైన్‌లో ఆ ప‌నుల‌తో బిజీగా ఉన్నా: రోహిత్

క‌రోనా వైరస్ కారణంగా ప్రజలు కొన్ని గుణపాఠాలు నేర్చుకుంటారని క‌పిల్‌ ఆశాభావం వ్యక్తం చేశాడు. ఇక‌నుంచి వ్యక్తిగత పరిశుభ్రతను అందరూ తప్పనిసరిగా పాటిస్తారని అభిప్రాయపడ్డాడు. అలాగే పరిసరాలను శుభ్రంగా ఉంచుకోవడాన్ని అలవాటు చేసుకోవాలని సూచించాడు. మ‌రోవైపు ప్రతి విషయంపై తను సానుకూలంగా ఆలోచిస్తారని గుర్తు చేశాడు. ఇక వైరస్ కారణంగా ప్రస్తుతం ప్రపంచ వ్యాప్తంగా క్రికెట్ కార్యకలాపాలు వాయిదా పడిన సంగతి తెలిసిందే. ఐపీఎల్, ఒలింపిక్స్‌ సహా ప్రతిష్టాత్మక టోర్నీలు పోస్ట్ పోన్‌ అయ్యాయి.