రషీద్‌ని ఢీకొట్టి పరుగులు రాబడతా: ధావన్

అఫ్గనిస్థాన్ స్పిన్ సంచలనం రషీద్ ఖాన్‌ని సమర్థంగా ఎదుర్కొని త్వరలో జరగనున్న ఏకైక టెస్టులో పరుగులు రాబడతానని భారత ఓపెనర్ శిఖర్ ధావన్ ధీమా వ్యక్తం చేశాడు. జూన్ 14 నుంచి బెంగళూరులోని చిన్నస్వామి స్టేడియంలో భారత్, అఫ్గనిస్థాన్‌ మధ్య ఏకైక టెస్టు మ్యాచ్ జరగనుంది. ఐపీఎల్‌లో ధావన్‌, రషీద్ ఖాన్ ఇద్దరూ సన్‌రైజర్స్ హైదరాబాద్‌ జట్టుకే ఆడటంతో.. అతడ్ని ఎదుర్కొనే అవకాశం ఇంతవరకూ ధావన్‌కి రాలేదు. దీంతో.. రషీద్‌ని ఎదుర్కోవడం కష్టమే అయినా.. సవాల్‌గా తీసుకుని ఆడతానని ధావన్‌ వెల్లడించాడు.

‘రషీద్ ఖాన్ బౌలింగ్‌ని తొలిసారి ఎదుర్కోబోతున్నాను. అతడి స్పిన్‌ని ఛేదించాలంటే చాలా కష్టమని నాకు తెలుసు. కానీ.. అత్యుత్తమంగా ఆడేందుకు ప్రయత్నిస్తా. ఏకైక టెస్టులో బరిలోకి దిగే భారత తుది జట్టులో నాకు అవకాశం దక్కితే.. రషీద్ ఖాన్ బౌలింగ్‌‌ రూపంలో నాకు ఓ కఠిన సవాల్ ఎదురుకానుంది’ అని ధావన్ వెల్లడించాడు. భారత టెస్టు జట్టులో మురళీ విజయ్, కేఎల్ రాహుల్ రూపంలో ఓపెనింగ్ స్థానానికి పోటీ పెరగడంపై మాట్లాడుతూ ‘భారత జట్టులో ఇలా పోటీ పెరగడం మంచిదే. ముగ్గరం మంచి అనుభవం ఉన్న ఓపెనర్లం. ఇటీవల ముగిసిన ఐపీఎల్ కేఎల్ రాహుల్ చాలా బాగా ఆడాడు. తుది జట్టులో స్థానం నిలుపుకోవడం ఒకింత ఒత్తిడితో కూడుకున్నదే. కానీ.. ప్రతి జట్టులోనూ ఇలాంటి ఒత్తిడి సహజం’ అని శిఖర్ ధావన్ వివరించాడు.