జీవా కోసం చిన్నపిల్లాడిలా మారిన ధోని..!

వికెట్ల వెనక నుంచి క్రీజులోని బ్యాట్స్‌మెన్‌లా ఆలోచిస్తూ వారిని ఔట్ చేయడంలో చేయితిరిగిన ధోని.. చిన్న పిల్లలతో ఆటలు ఆడుకునేటప్పుడు వారిలానే ప్రవర్తిస్తూ తెగ ఎంజాయ్ చేస్తున్నాడు. తాజాగా తన కూతురు జీవాతో కలిసి సరదాగా గార్డెన్‌లో ఆడుకుంటున్న సమయంలో గడ్డిపై జీవా పాకుతూ వెళ్లగా.. ధోని కూడా పాపను అనుసరిస్తూ అలానే చేశాడు.

టెస్టులకి రిటైర్మెంట్ ప్రకటించిన తర్వాత పరిమిత ఓవర్ల క్రికెట్ మాత్రమే ఆడుతున్న ధోని.. ఇటీవలే కెప్టెన్సీ బాధ్యతల నుంచి తప్పుకున్న విషయం తెలిసిందే. ప్రస్తుతం టీమిండియా టెస్టు సిరీస్‌లు మాత్రమే ఆడుతుండటంతో ధోని ఇంటి దగ్గర విశ్రాంతి తీసుకుంటున్నాడు. 2015లో జీవా పుట్టినప్పుడు ధోని ఆస్ట్రేలియాలో ఉన్నాడు. దీంతో దాదాపు రెండు నెలల పాటు పాపను కనీసం చూడలేకపోయాడు.

Mahi playing with Ziva 💞 Started the day with this lovely one 😍 pic.twitter.com/jDgDvnxHan — Dhruva Natchathiram✨ (@RDBalaji) February 15, 2017
ఆ సమయంలో ఓ తండ్రిగా చాలా బాధపడినట్లు ధోని అప్పట్లో చెప్పకొచ్చాడు. మధ్యలో కూడా ఎడతెరిపిలేని క్రికెట్ కారణంగా కుటుంబానికి దూరమవడం.. పాప కూడా తనని ఎవరో కొత్త వ్యక్తిగా చూస్తూ దగ్గరికి రాకపోవడంతో చాలా ఇబ్బందిగా అనిపించిందన్నాడు. టెస్టులకి రిటైర్మెంట్ ప్రకటించడానికి ఇది కూడా ఓ కారణమని ధోని అప్పట్లో వివరించాడు.