బెన్‌స్టోక్స్ నువ్వు బౌండరీ లైన్ వద్దే..!

మైదానంలో ఆటతోనే కాకుండా మాటలతోనూ ప్రత్యర్థులపై విరుచుకుపడే నైజమున్న ఇంగ్లాండ్‌ ఆల్‌రౌండర్‌ బెన్‌స్టోక్స్‌కి ఊహించని వార్నింగ్ వచ్చింది. వెస్టిండీస్‌తో ఈ నెల 11 నుంచి సొంతగడ్డపై ఇంగ్లాండ్‌ ఒక టీ20, ఐదు వన్డేలు ఆడనుంది. ఈ నేపథ్యంలో వెస్టిండీస్ ఆల్‌రౌండర్ మార్లోన్ శ్యామూల్స్‌ మీడియాతో మాట్లాడుతూ బెన్‌స్టోక్స్‌కి హెచ్చరికలు జారీ చేశాడు. తాను బ్యాటింగ్ చేస్తుంటే.. వీలైనంత ఎక్కువ సేపు బెన్‌స్టోక్స్‌ని బౌండరీ లైన్‌ వద్దే ఫీల్డింగ్ చేసేలా చేస్తానని సవాల్ విసిరాడు. రెండేళ్ల క్రితం శ్యామూల్స్‌ ఔటై పెవిలియన్‌కి వెళ్తుండగా.. బౌండరీ లైన్ వద్ద ఉన్న బెన్‌స్టోక్స్ అతడ్ని కవ్వించాడు. గత ఏడాది టీ20 ప్రపంచకప్ ఫైనల్లోనూ వీరి మధ్య ఆధిపత్య పోరు సాగింది.

‘నేను బ్యాటింగ్ చేస్తుంటే బెన్‌స్టోక్స్‌ బౌండరీ లైన్ వద్దే ఫీల్డింగ్ చేస్తుండాలి. వీలైనంత ఎక్కువ సేపు అతడ్ని అక్కడే ఉంచేందుకు ప్రయత్నిస్తా. ఈ సిరీస్‌లో అతను సైలెంట్‌గా ఉంటే నేను ఏమీ గొడవ మొదలుపెట్టను. గత కొద్దిరోజుల నుంచి బెన్‌స్టోక్స్ మారాడని అంతా చెప్తున్నారు. నేను కూడా మంచివాడిగానే ఇంగ్లాండ్‌కి వెళ్తున్నా. అక్కడ కూడా ఇలానే ఉండాలని కోరుకుంటున్నా. కానీ.. స్టోక్స్ తొలుత కవ్విస్తే మాత్రం తప్పకుండా గొడవ మొదలవుతుంది’ అని శ్యామూల్స్ వివరించాడు.