బంగ్లాదేశ్ మాజీ కెప్టెన్ మొర్తజాకి మళ్లీ కరోనా పాజిటివ్

బంగ్లాదేశ్ మాజీ కెప్టెన్ ముష్రఫె మొర్తజాకి మళ్లీ కరోనా పాజిటివ్‌గా తేలింది. గత నెలలో తనకి కరోనా సోకినట్లు ఫేస్‌బుక్ ద్వారా వెల్లడించిన మొర్తజా.. ఢాకాలోని తన నివాసంలో ఉండి చికిత్స తీసుకుంటున్నాడు. కానీ.. ఇప్పటికీ అతను ఆ వైరస్ బారి నుంచి కోలుకోలేదని తాజా పరీక్షల్లో తేలిపోయింది. రానున్న బుధవారం మూడోసారి అతనికి కరోనా పరీక్షలు చేయనున్నట్లు బంగ్లాదేశ్ క్రికెట్ బోర్డు (బీసీబీ) వెల్లడించింది.

బంగ్లాదేశ్‌కే చెందిన అంతర్జాతీయ క్రికెటర్ నఫీస్ ఇక్బాల్ తొలుత కరోనా వైరస్ బారినపడగా.. రోజుల వ్యవధిలోనే మొర్తజాకి పాజిటివ్‌గా తేలింది. ఈ విషయాన్ని జూన్ 20న అభిమానులతో పంచుకున్న మొర్తజా.. త్వరలోనే ఈ వైరస్ నుంచి కోలుకుని మీ ముందుకు వస్తానని చెప్పుకొచ్చాడు. కానీ.. శనివారం నిర్వహించిన పరీక్షల్లో అతనికి మళ్లీ పాజిటివ్ వచ్చింది.

‘‘కరోనా విషయంలో చాలా వరకూ పేషంట్ 14 రోజుల్లోనే కోలుకుంటాడు. కానీ.. కొన్ని కేసుల్లో మాత్రం మరికొన్ని రోజులు అదనపు సమయం పడుతుంది’’ అని బీసీబీ ఫిజీషియన్ దెబశిష్ చౌదరి వెల్లడించాడు. బంగ్లాదేశ్ క్రికెటర్లే కాదు.. పాకిస్థాన్‌కి చెందిన పది మంది క్రికెటర్లకి కూడా ఇటీవల కరోనా పాజిటివ్ వచ్చింది. అయితే.. నాలుగు రోజుల వ్యవధిలోనే అందులో ఆరుగురికి నెగటివ్‌రాగా.. నలుగురికి మాత్రం మళ్లీ పాజిటివ్ వచ్చింది.