పెళ్లిరోజు.. మైదానంలో భార్యకి బిన్నీ ఇంటర్వ్యూ

పేలవ ప్రదర్శనతో భారత జట్టుకి దూరమైన ఫాస్ట్ బౌలర్ స్టువర్ట్‌బిన్నీ ఐపీఎల్ తరహాలో ప్రస్తుతం జరుగుతున్న కర్ణాటక ప్రీమియర్ లీగ్‌లో సత్తాచాటాడు. బంతితో 32/4తో మెరిసిన బిన్నీ.. బ్యాట్‌తో కూడా 46 బంతుల్లోనే 87 పరుగులు చేయడంతో అతను ప్రాతినిథ్యం వహిస్తున్న బెళగావి పాంథర్స్ జట్టు అలవోక విజయాన్ని అందుకుంది. ఈ గెలుపులో కీలక పాత్ర పోషించిన బిన్నీ ‘మ్యాన్ ఆఫ్ ద మ్యాచ్‌’గా ఎంపికయ్యాడు.

అవార్డు స్వీకరణ అనంతరం మైదానంలో బిన్నీ‌తో ఇంటర్వ్యూ తీసుకునేందుకు యాంకర్ మయాంతి లాంగర్ వచ్చింది. ఈ మయాంతి ఎవరో తెలుసు కదా..? స్టువర్ బిన్నీ భార్యే. దీంతో ఇంటర్వ్యూ సమయంలో ఇద్దరూ సిగ్గుపడిపోతూ తెగ సంబరపడిపోయారు. శుక్రవారం సరదాగా సాగిన ఈ ఇంటర్వ్యూ ఇప్పుడు సోషల్ మీడియాలో వైరల్‌గా మారింది. కారణం.. శుక్రవారం వారి పెళ్లిరోజు. స్పెషల్ డే రోజు అద్భుతమైన ప్రదర్శన చేశావు బిన్నీ.. ముచ్చటైన జంట.. మయాంతి ఇదే నీ కెరీర్‌లో బెస్ట్ ఇంటర్వ్యూ అంటూ అభిమానులు సోషల్ మీడియాలో తెగ కామెంట్లు పెడుతున్నారు. కర్ణాటక ప్రీమియర్‌ లీగ్‌కి ఈ జంట ఇంటర్వ్యూ బాగా ప్రచారం కల్పిస్తోందని మరికొందరు కామెంట్ చేస్తున్నారు.

@MayantiLanger_B this are the best days for you & your hubby & happy anniversary day👩‍❤️‍👩❤️happy to watch husband interviewed by wife ❤️ pic.twitter.com/23CVmhEYyP — Ansaf (@Ansaf86) September 8, 2017