IND vs AUS 2nd Testకి భారత్ జట్టులో ఐదు మార్పులు..?

ఆస్ట్రేలియా గడ్డపై తొలి టెస్టులో పేలవంగా ఓడిపోయిన భారత్ జట్టు.. రెండో టెస్టులో పుంజుకోవాలని ఆశిస్తోంది. డిసెంబరు 26 నుంచి మెల్‌బోర్న్ వేదికగా ఈ మ్యాచ్ జరగనుండగా.. టీమిండియా ఐదు మార్పులతో బరిలోకి దిగే సూచనలు కనిపిస్తున్నాయి. తొలి టెస్టులో గాయపడి ఫాస్ట్ బౌలర్ మహ్మద్ షమీ, పితృత్వ సెలవులు తీసుకుని కెప్టెన్ విరాట్ కోహ్లీ టెస్టు సిరీస్‌కి దూరమైపోగా.. వారి స్థానాల్లో ఎవరిని ఆడించాలి..? అని తర్జన భర్జనలు పడిన భారత్ జట్టు మేనేజ్‌మెంట్ ఆఖరిగా ఐదు మార్పులకి గ్రీన్ సిగ్నల్ ఇచ్చినట్లు తెలుస్తోంది. దాంతో హైదరాబాద్‌కి చెందిన ఫాస్ట్ బౌలర్ మహ్మద్ సిరాజ్‌‌‌‌ టెస్టుల్లోకి ఎంట్రీ ఇవ్వడం లాంఛనంగా కనిపిస్తుండగా.. యువ క్రికెటర్ శుభమన్ గిల్‌కీ అవకాశం దక్కనుంది.

రెండో టెస్టుకి భారత్ తుది జట్టు (అంచనా): మయాంక్ అగర్వాల్, కేఎల్ రాహుల్, చతేశ్వర్ పుజారా, శుభమన్ గిల్, అజింక్య రహానె (కెప్టెన్) రవీంద్ర జడేజా, రిషబ్ పంత్ (వికెట్ కీపర్), రవిచంద్రన్ అశ్విన్, ఉమేశ్ యాదవ్, జస్‌ప్రీత్ బుమ్రా, మహ్మద్ సిరాజ్

తొలి టెస్టు రెండు ఇన్నింగ్స్‌లో కలిపి 0, 4 పరుగులు చేసిన యువ ఓపెనర్ పృథ్వీ షాపై వేటు పడనుండగా.. అతని స్థానంలో కేఎల్ రాహుల్‌కి ఓపెనర్‌గా ఛాన్స్ దక్కే సూచనలు కనిపిస్తున్నాయి. ఇక కెప్టెన్ విరాట్ కోహ్లీ స్థానంలో శుభమన్ గిల్‌కి అవకాశం ఇవ్వాలని యోచిస్తున్న టీమిండియా మేనేజ్‌మెంట్.. తెలుగు క్రికెటర్ హనుమ విహారిని పక్కకి తప్పించి ఆల్‌రౌండర్ రవీంద్ర జడేజాని తుది జట్టులోకి తీసుకోనుంది. విహారి రెండు ఇన్నింగ్స్‌ల్లో 16, 8 పరుగులే చేశాడు. ఇక వికెట్ కీపర్ సాహా 9, 4 పరుగులు చేయగా.. అతని స్థానంలో యువ వికెట్ కీపర్ రిషబ్ పంత్‌కి చోటిచ్చే సూచనలు ఎక్కువగా కనిపిస్తున్నాయి. మరీ ముఖ్యంగా.. తొలి టెస్టులో టీమ్‌లో ఒక్క ఎడమచేతి వాటం బ్యాట్స్‌మెన్ లేకపోవడం భారత్‌కి బలహీనతగా మారిందని మేనేజ్‌మెంట్ భావిస్తోంది. ఇక ఆఖరిగా మోచేతి గాయంతో సిరీస్‌కి దూరమైన షమీ స్థానంలో సిరాజ్ జట్టులోకి రానున్నాడు.