#MeToo బీసీసీఐ సీఈవోపై మరో ఫిర్యాదు..!

భారత క్రికెట్ నియంత్రణ మండలి (బీసీసీఐ) సీఈవో రాహుల్ జోహ్రి చుట్టూ ఉచ్చు మరింత బిగిసింది. ఇప్పటికే ఓ మహిళ చేసిన లైంగిక ఆరోపణలతో ఉక్కిరిబిక్కిరి అవుతున్న రాహుల్ జోహ్రిపై.. తాజాగా మరో మహిళ ఫిర్యాదు చేసింది. దీంతో.. అతనిపై బీసీసీఐ పాలకుల కమిటీ వెంటనే చర్యలు తీసుకునే సూచనలు కనిపిస్తున్నాయి.

బీసీసీఐ సీఈవోగా 2016లో బాధ్యతలు చేపట్టిన రాహుల్ జోహ్రి.. అంతకముందు డిస్కవరీ నెట్‌వర్క్స్‌లో ఉన్నత పదవుల్లో పనిచేశాడు. ఆ సమయంలో ఉద్యోగం ఇప్పిస్తానని తనని జోహ్రి మభ్యపెట్టినట్లు మీటూ ఉద్యమంలో భాగంగా ట్విట్టర్ వేదికగా ఈనెల ఆరంభంలో ఓ మహిళ ఆరోపించింది. దీంతో.. ఆ ఆరోపణలపై రెండువారాల్లోపు వివరణ ఇవ్వాలని జోహ్రిని పాలకుల కమిటీ ఆదేశించగా.. గత శనివారం అతను ఆ ఆరోపణల్ని ఖండిస్తూ తన వివరణని సమర్పించాడు.

కానీ.. ఈ వివరణపై సంతృప్తి చెందని కమిటీలోని మహిళా సభ్యురాలు డయానా ఎడుల్జి.. అతడ్ని వెంటనే సీఈవో పదవి నుంచి తప్పించాలని అభిప్రాయపడింది. అయితే.. న్యాయపరమైన చిక్కులు ఎదురుకాకుండా ఉండేందుకు ముగ్గురు సభ్యులతో కూడిన ప్రత్యేక కమిటీని నియమించి విచారణ, నివేదిక తర్వాత చర్యలు తీసుకుందామని సోమవారం జరిగిన సమావేశంలో ఆమెకి కమిటీ ఛైర్మన్ వినోద్ రాయ్ సర్దిచెప్పినట్లు తెలుస్తోంది. ఈ మేరకు అలహాబాద్ హైకోర్టు రిటైర్డ్ జడ్జ్ జస్టిస్ రాకేశ్ శర్మ ఛైర్మన్‌గా, ఢిల్లీ మహిళా కమీషన్ ఛైర్‌పర్సన్ బరాఖ్ సింగ్, సీబీఐ మాజీ డైరెక్టర్ పీసీ వర్మతో ఓ కమిటీని ఏర్పాటు చేసి 15రోజుల్లోపు నివేదిక ఇవ్వాలని పాలకుల కమిటీ ఆదేశించింది.

ఒకవైపు ఈ విచారణ జరుగుతుండగానే.. తాజాగా మరో మహిళ రాహుల్ జోహ్రిపై లైంగిక ఆరోపణలు చేస్తూ రాత పూర్వకంగా డయానా ఎడుల్జికి నిన్న ఫిర్యాదు చేసినట్లు తాజాగా వెలుగులోకి వచ్చింది. తన సూచన మేరకే డైరెక్ట్‌గా ఎడుల్జికి బాధితురాలు ఫిర్యాదు చేసిందని వెల్లడించిన ముంబయి జట్టు మాజీ కెప్టెన్ షిషీర్ హట్టాంగడి విచారణ కోసం అవసరమైతే తాను సాయం అందిస్తానని చెప్పుకొచ్చాడు. జోహ్రిపై ఆరోపణలు చేసిన ఇద్దరు మహిళలూ మీడియా రంగానికి చెందిన వారే కావడం గమనార్హం.