కోహ్లిని గ్రేట్‌ బ్యాట్స్‌మెన్‌గా పిలవాలంటే..?

భారత కెప్టెన్ విరాట్ కోహ్లి అద్భుతమైన బ్యాట్స్‌మెన్.. కానీ.. గొప్ప బ్యాట్స్‌మెన్‌గా అతడ్ని తాను పిలవాలంటే మాత్రం ఇంగ్లాండ్ గడ్డపై కూడా పరుగులు చేయాలని వెస్టిండీస్ మాజీ క్రికెటర్ మైకేల్ హోల్డింగ్ అభిప్రాయపడ్డాడు. ఓ మీడియా సంస్థకి సోమవారం ఇచ్చిన ఇంటర్వ్యూలో హోల్డింగ్ మాట్లాడుతూ.. అన్ని పిచ్‌లపై పరుగులు సాధించే ఆటగాడే గొప్ప బ్యాట్స్‌మెన్‌గా చరిత్రలో నిలుస్తాడన్నాడు. దక్షిణాఫ్రికాతో ఇటీవల ముగిసిన రెండో టెస్టు మొదటి ఇన్నింగ్స్‌లో 153 పరుగులు చేసిన కోహ్లి.. టెస్టు ర్యాంకింగ్స్‌లోనూ ప్రస్తుతం నెం.2 ర్యాంక్‌లో కొనసాగుతున్నాడు. కానీ.. కోహ్లిని గొప్ప ఆటగాడిగా తాను పిలవలేనని హోల్డింగ్ వెల్లడించాడు.

‘విరాట్ కోహ్లి అద్భుతమైన బ్యాట్స్‌మెన్. క్రికెట్ ప్రపంచంలో ముగ్గురు అత్యుత్తమ క్రికెటర్ల పేర్లను చెప్పమంటే.. అందులో కచ్చితంగా విరాట్ కోహ్లి పేరుని చేర్చుతాను. ఎందుకంటే.. అతను చాలా ప్రతిభ ఉన్న ఆటగాడు. అయితే.. ఇంగ్లాండ్‌ గడ్డపై కోహ్లి పరుగులు చేస్తేనే.. నేను అతడ్ని గొప్ప బ్యాట్స్‌మెన్‌గా పిలుస్తాను. అన్ని పిచ్‌లపై పరుగులు రాబట్టే బ్యాట్స్‌మెన్ అంటేనే నాకిష్టం. ప్రస్తుత తరంలో బెస్ట్ క్రికెటర్లు జో రూట్, విరాట్ కోహ్లి, స్టీవ్ స్మిత్‌. దక్షిణాఫ్రికా హిట్టర్ డివిలియర్స్ పేరు కూడా ఈ జాబితాలో చేర్చాలని ఉంది. కానీ.. అతను ఈ మధ్యనే మళ్లీ టెస్టు క్రికెట్ ఆడుతున్నాడు. ఒకవేళ ఏబీ సుదీర్ఘ ఫార్మాట్‌లో సత్తాచాటితే.. తప్పకుండా అతని పేరుని ఈ బెస్ట్ క్రికెటర్ల జాబితాలో చేరుస్తా’ అని హోల్డింగ్ వెల్లడించాడు.