ప్రపంచ కప్ ముంగిట కివీస్‌కి భారీ షాక్

ప్రపంచ కప్ కోసం మిగతా దేశాలు సన్నద్ధం అవుతున్న దశలో న్యూజిలాండ్‌ క్రికెట్ జట్టుకి షాక్ తగిలింది. ఆ జట్టు ప్రధాన కోచ్ పదవికి మైక్ హెస్సన్ రాజీనామా చేశారు. ఆరేళ్లుగా కోచ్‌గా సేవలందిస్తోన్న ఆయన గురువారం అనూహ్యంగా రాజీనామా చేయడం అందర్నీ ఆశ్చర్యానికి గురి చేసింది. 43 ఏళ్ల హెస్సన్.. బెండ్రన్ మెక్‌కల్లమ్‌తో కలిసి కివీస్ జట్టుకు చక్కటి విజయాలను అందించాడు. ఆయన శిక్షణలో న్యూజిలాండ్ జట్టు ఆటతీరే కాకుండా ప్రవర్తన పరంగానూ ఎంతో మెరుగైంది.

వచ్చే ఏడాది వన్డే వరల్డ్ కప్ ముగిసే వరకూ హెస్సన్ పదవిలో కొనసాగే వీలు ఉన్నప్పటికీ.. ఆయన అనూహ్య నిర్ణయం తీసుకున్నారు. కోచ్ పదవి నుంచి వెంటనే వైదొలగడం లేదని, జూలై 31 వరకూ బాధ్యతలు నిర్వర్తిస్తానని ఆయన చెప్పారు. భార్యా పిల్లలతో ఎక్కువ సమయం గడపటం కోసం ఈ నిర్ణయం తీసుకున్నట్లు హెస్సన్ చెప్పారు.

‘కోచ్ బాధ్యతలు చేపట్టడానికి నూటికి నూరు శాతం కమిట్‌మెంట్ అవసరం. కానీ బాధ్యతల కారణంగా కుటుంబానికి టైం కేటాయించలేక పోతున్నా’నని హెస్సన్ తెలిపారు. వరల్డ్ కప్ ముగిసే వరకూ కోచ్‌గా కొనసాగాలని న్యూజిలాండ్ క్రికెట్ సీఈవో డేవిడ్ వైట్ కోరినప్పటికీ.. హెస్సన్ సున్నితంగా తోసిపుచ్చారు.

హెస్సన్ 2012 ఆగష్టులో న్యూజిలాండ్ జట్టు కోచ్‌గా బాధ్యతలు చేపట్టారు. ఆ జట్టుకు సుదీర్ఘ కాలంపాటు పని చేసిన శిక్షకుడిగా ఆయన రికార్డ్ నెలకొల్పారు. గతంలో ఆయన కెన్యా కోచ్‌గా పని చేశారు. ఆయన కివీస్ కోచ్‌గా బాధ్యతలు చేపట్టగానే టేలర్ నుంచి కెప్టెన్సీని మెక్‌కల్లమ్‌కు కట్టబెట్టి తనదైన మార్క్ చూపించారు.

హెస్సన్ శిక్షణలోనే న్యూజిలాండ్ జట్టు 2015 వరల్డ్ కప్ ఫైనల్ చేరింది. ప్రస్తుతం ఆ జట్టు మూడు ఫార్మాట్లలోనూ నాలుగో స్థానంలో ఉంది. గత వేసవిలో కివీస్ వరుసగా 13 మ్యాచ్‌లు నెగ్గింది. 20 ఏళ్లలో తొలిసారిగా ఇంగ్లాండ్‌పై టెస్టు సిరీస్ గెలుపొందింది.