IND vs AUS: మిచెల్ స్టార్క్ కవ్వింపులకి.. జడేజా ఘాటు రిప్లై

మెల్‌బోర్న్ వేదికగా జరుగుతున్న రెండో టెస్టు మ్యాచ్‌లో భారత ఆల్‌రౌండర్ రవీంద్ర జడేజా వికెట్ పడగొట్టిన ఆస్ట్రేలియా ఫాస్ట్ బౌలర్ మిచెల్ స్టార్క్ హద్దులు మీరి సంబరాలు చేసుకున్నాడు. ఇన్నింగ్స్ 107వ ఓవర్ వేసిన స్టార్క్.. గంటకి 143.8 కిమీ వేగంతో షార్ట్ పిచ్ బంతిని విసరగా.. దాన్ని రవీంద్ర జడేజా (57: 159 బంతుల్లో 3x4) డీప్ మిడ్ వికెట్ దిశగా ఫుల్ చేసే ప్రయత్నం చేశాడు. కానీ.. షాట్ అతను ఆశించిన విధంగా కనెక్ట్ కాలేదు.

బంతి సరిగా బ్యాట్‌‌కి మిడిల్ కాకపోవడంతో డీప్ మిడ్ వికెట్ దిశగా బంతి గాల్లోకి లేవగా.. అక్కడే ఫీల్డింగ్ చేస్తున్న పాట్ కమిన్స్ చక్కగా క్యాచ్ అందుకున్నాడు. దాంతో.. వికెట్ తీసిన ఆనందంలో మిచెల్ స్టార్క్.. జడేజా వైపు చూస్తూ గట్టిగా అరిచి సంబరాలు చేసుకున్నాడు. స్టార్క్ హద్దులు దాటడంపై జడేజా మైదానంలోనే ఘాటుగా బదులిస్తూ కనిపించాడు. దాంతో.. స్టార్క్ వెనక్కి తగ్గాడు. మ్యాచ్‌లో మిచెల్ స్టార్క్ మూడు వికెట్లు పడగొట్టాడు.

మ్యాచ్‌లో అజింక్య రహానెతో కలిసి ఆరో వికెట్‌కి 121 పరుగుల భాగస్వామ్యాన్ని జడేజా నెలకొల్పడంతో.. భారత్ జట్టు మొదటి ఇన్నింగ్స్‌లో 326 పరుగుల మెరుగైన స్కోరుని అందుకోగలిగింది.