లైవ్‌లో ఆసీస్ స్పిన్నర్ ‘షార్ట్‌’ లాగేశాడు..!

భారత్, ఆస్ట్రేలియా మధ్య పెర్త్ వేదికగా జరుగుతున్న రెండో టెస్టు మ్యాచ్‌లో ఓ ఆసక్తికరమైన సరదా సన్నివేశం చోటు చేసుకుంది. ఆటలో మూడో రోజైన ఆదివారం మరికొద్దిసేపట్లో మ్యాచ్‌ మొదలవుతుందనగా.. పిచ్‌ స్పందిస్తున్న తీరుపై ఆస్ట్రేలియా స్పిన్నర్ నాథన్ లయన్ ‘లైవ్‌’లో మాట్లాడాడు. ఆ సమయంలో అతని వెనుకే రన్నింగ్ ప్రాక్టీస్ చేస్తూ ఉన్న ఆసీస్ ఫాస్ట్ బౌలర్ మిచెల్ స్టార్క్.. అనూహ్యంగా వచ్చి లయన్ వేసుకున్న షార్ట్ లాగేశాడు. కానీ.. సహచరుడి‌ చర్యని సరదాగా తీసుకున్న లయన్.. ఏమీ ఎరుగనట్లు మళ్లీ షార్ట్‌ని పైకిలాగేసుకుని తన మాటల్ని కొనసాగించాడు. ఇప్పుడు ఈ వీడియో సోషల్ మీడియాలో వైరల్‌గా మారింది.

ఈ మ్యాచ్‌లో తొలుత బ్యాటింగ్ చేసిన ఆస్ట్రేలియా జట్టు 326 పరుగులకి ఆలౌటవగా.. అనంతరం భారత్ జట్టు మొదటి ఇన్నింగ్స్‌లో ఈరోజు 283 పరుగులకే పరిమితమైంది. స్పిన్నర్ నాథన్ లయన్ 67 పరుగులిచ్చి ఏకంగా 5 వికెట్లు పడగొట్టాడు. అజింక్య రహానె (51), రిషబ్ పంత్ (36), మహ్మద్ షమీ (0), ఇషాంత్ శర్మ (1), జస్‌ప్రీత్ బుమ్రా (4) రూపంలో ఐదు వికెట్లనీ ఈరోజే లయన్ పడగొట్టడం విశేషం.